امریکہ کی ناظم الامور نٹالی بیکر کی ڈپٹی وزیراعظم و وزیر خارجہ اسحاق ڈار سے ملاقات

اسلام آباد:امریکہ کی ناظم الامور نٹالی بیکر نے ڈپٹی وزیراعظم و وزیر خارجہ سینیٹر محمد اسحاق ڈار سے وزارتِ خارجہ میں ملاقات کی، جس میں دوطرفہ تعلقات، معاشی تعاون، سرمایہ کاری اور خطے کی بدلتی صورتِ حال پر تفصیلی تبادلہ خیال کیا گیا۔
ملاقات میں ڈپٹی وزیراعظم/وزیر خارجہ اسحاق ڈار نے پاکستان اور امریکہ کے درمیان اقتصادی و سرمایہ کاری تعاون میں اضافے کی اہمیت پر زور دیا۔ انہوں نے کہا کہ پاکستان انفارمیشن ٹیکنالوجی، توانائی اور اہم معدنیات کے شعبوں میں امریکی سرمایہ کاری کا خیرمقدم کرتا ہے۔
اس موقع پر اسحاق ڈار نے پاکستان میں امریکی کمپنیوں کی بڑھتی ہوئی دلچسپی کو مثبت قرار دیتے ہوئے ہری پور میں گوگل کروم کی اسمبل لائن کے قیام کا خیر مقدم کیا اور امید ظاہر کی کہ یہ پیش رفت پاکستان کے ٹیک سیکٹر میں نئے مواقع پیدا کرے گی۔
دونوں ممالک کے درمیان جاری اقتصادی اور تجارتی تعاون کو مزید مستحکم بنانے پر بھی اتفاق کیا گیا۔علاقائی اور عالمی صورتحال پر گفتگو کرتے ہوئے دونوں رہنماؤں نے غزہ کے لیے جاری بین الاقوامی امن کوششوں کا جائزہ لیا۔ ڈپٹی وزیراعظم نے خطے میں امن کے قیام، انسانی ہمدردی کی بنیاد پر فوری جنگ بندی اور فلسطینی عوام کے تحفظ کی ضرورت پر زور دیا۔
امریکی ناظم الامور نے پاکستان کے ساتھ دوطرفہ تعاون کو مزید مضبوط بنانے کے لیے امریکی حکومت کی خواہش کا اعادہ کیا اور مختلف شعبوں میں شراکت داری جاری رکھنے کا یقین دلایا۔ملاقات خوشگوار ماحول میں ہوئی اور دونوں ممالک نے مختلف دوطرفہ اور علاقائی معاملات پر رابطے جاری رکھنے پر اتفاق کیا۔