دی اکانومسٹ کی رپورٹ میں بانی پی ٹی آئی کی حقیقت کھل کر سامنے آگئی، عطا تارڑ

لاہور: وفاقی وزیر اطلاعات عطا تارڑ نے کہا ہے کہ دی اکانومسٹ کی رپورٹ میں بانی پی ٹی آئی کی حقیقت کھل کر سامنے آگئی۔

تفصیلات کے مطابق وفاقی وزیر اطلاعات عطا تارڑ نے لاہور میں میڈیا سے گفتگو کرتے ہوئے کہا کہ مجھ پر جرح ہوئی اور تمام سوالات کے جوابات دیے۔

انہوں نے پی ٹی آئی کے بانی پر تنقید کرتے ہوئے کہا کہ بانی نے شہباز شریف پر جھوٹے الزامات عائد کیے تھے، اور بیرون ملک بیٹھے شخص کے خلاف لندن کی عدالت نے بھی حکم جاری کیا ہے۔

ان کا کہنا تھا کہ بانی پی ٹی آئی کو تمام جھوٹے الزامات کا جواب دینا ہوگا اور دی اکانومسٹ کی رپورٹ میں بانی کی اصل حقیقت کھل کر سامنے آگئی ہے۔

عطا تارڑ نے بشریٰ بی بی کے کردار پر بھی بات کرتے ہوئے کہا کہ وہ تمام حکومتی، معاشی اور سیاسی فیصلوں میں اثر انداز ہوتی تھیں اور پی ٹی آئی کے پاس الزام تراشی کے علاوہ کچھ بھی نہیں۔

وفاقی وزیر کا کہنا تھا کہ بشریٰ بی بی نے باہر بیٹھ کر باتیں کرنے والے افراد سے کہا کہ وہ ملک واپس آئیں اور سوشل میڈیا کانفرنس کریں۔

عطا تارڑ نے وانا میں کامیاب سیکیورٹی آپریشن پر سیکیورٹی فورسز کو خراج تحسین پیش کیا اور کہا کہ مہارت سے کیے گئے اس آپریشن کے دوران ساڑھے پانچ سو طلبا کی جان بچائی گئی۔

ان کا مزید کہنا تھا کہ وانا میں اے پی ایس سے بڑا سانحہ ہوسکتا تھا، ہارڈ ٹارگٹ میں ناکامی کے بعد اب یہ سافٹ ٹارگٹ پر اتر آئے۔