وزیراعظم اور شاہ عبداللہ دوم کی اہم ملاقات؛ متعدد شعبوں میں مفاہمتی یادداشتوں پر دستخط

اسلام آباد: پاکستان کے وزیراعظم شہباز شریف اور اردن کے شاہ عبداللہ دوم کے درمیان وزیرِاعظم ہاؤس میں تاریخی ملاقات ہوئی، جس میں دوطرفہ تعلقات کو نئی جہت دینے اور متعدد شعبوں میں شراکت داری کو مضبوط بنانے پر اتفاق کیا گیا۔

تفصیلات کے مطابق دونوں ممالک نے دفاع، تجارت، ٹیکنالوجی، تعلیم، سرمایہ کاری اور ثقافتی تبادلوں سمیت کئی شعبوں میں تعاون بڑھانے کے لیے نئے مواقع تلاش کرنے پر اتفاق کیا۔

اس موقع پر آرمی چیف جنرل سید عاصم منیر بھی شریک ہوئے، جنہوں نے دفاعی رابطوں، تربیتی تعاون اور سیکیورٹی شراکت داری پر بریفنگ پیش کی۔

ملاقات میں علاقائی اور عالمی صورتحال پر بھی تفصیلی گفتگو ہوئی، خصوصاً مشرقِ وسطیٰ کے بدلتے حالات اور فلسطینی بحران پر دونوں ممالک نے گہری تشویش کا اظہار کیا۔

پاکستان اور اردن نے غزہ میں انسانی تکالیف کے خاتمے، فوری جنگ بندی اور دیرپا امن کے لیے عالمی برادری کے فعال کردار پر زور دیا، جبکہ غزہ امن عمل کو آگے بڑھانے پر بھی اتفاق کیا گیا۔

وزیراعظم نے شاہ عبداللہ دوم کو افغانستان اور بھارت کی تازہ صورتحال سے آگاہ کیا اور خطے میں امن و استحکام کے لیے پاکستان کی پالیسی ترجیحات سے روشناس کرایا۔

دورے کے دوران پاکستان اور اردن کے درمیان میڈیا، ثقافت اور تعلیم کے شعبوں میں تعاون کی مفاہمتی یادداشتوں پر دستخط بھی کیے گئے، جن سے دونوں ممالک کے ادارہ جاتی روابط مزید مضبوط ہوں گے۔

وزیراعظم شہباز شریف نے شاہ عبداللہ دوم کے اعزاز میں خصوصی عشائیہ بھی دیا۔

دونوں ملکوں کی قیادت نے اس موقع پر اعلیٰ سطحی رابطوں کو مستقبل میں مستقل بنیادوں پر جاری رکھنے کے عزم کا اظہار کیا۔

وزیراعظم نے کہا کہ شاہ عبداللہ کا دورہ دو طرفہ دوستی کی مضبوطی اور دیرینہ تعلقات کی گواہی ہے۔