پاکستان کا آئین مذہبی آزادی اور بنیادی حقوق کی مکمل ضمانت دیتا ہے، صدرِ مملکت

صدرِ مملکت آصف علی زرداری نے کہا ہے کہ پاکستان کا آئین مذہبی آزادی اور بنیادی حقوق کی مکمل ضمانت دیتا ہے۔

تفصیلات کے مطابق صدرِ مملکت آصف علی زرداری نے عالمی یومِ برداشت کے موقع پر قوم کے نام اپنے خصوصی پیغام میں اتحاد، ہم آہنگی اور رواداری کی ضرورت پر زور دیا۔

انہوں نے کہا کہ پاکستان امن، برداشت اور باہمی احترام کے فروغ کے لیے پُرعزم ہے اور اسی جذبے کے تحت بین الاقوامی برادری کے ساتھ یکجہتی کا اظہار کرتا ہے۔

ان کا کہنا تھا کہ اسلام انسانیت، شفقت اور عدل کا درس دیتا ہے، جبکہ قائداعظمؒ کا ویژن ہر شہری کے مساوی حقوق اور مذہبی آزادی کے اصولوں پر مبنی ہے۔

آصف علی زرداری نے کہا کہ پاکستان کا آئین تمام شہریوں کو بنیادی اور مذہبی حقوق کی مکمل ضمانت فراہم کرتا ہے۔

صدرِ مملکت نے واضح کیا کہ حکومت سماجی اور مذہبی استحصال کے خاتمے کے لیے کوشاں ہے اور غیر مسلم شہریوں کے حقوق کا تحفظ حکومت کی اولین ترجیح ہے۔

انہوں نے کہا کہ بین المذاہب ہم آہنگی کی قومی پالیسی پر بھرپور عمل درآمد جاری ہے جبکہ نیشنل کمیشن فار مائنارٹیز رائٹس بل 2025 اس سمت میں ایک اہم پیش رفت ہے، اقلیتوں کے حقوق کے تحفظ کے لیے پارلیمانی منارٹیز کی تشکیل بھی خوش آئند ہے۔

صدر آصف زرداری نے نوجوانوں پر زور دیا کہ وہ معاشرے میں تعصب، نفرت اور عدم برداشت کے خلاف کھڑے ہوں اور ملک میں امن و ہم آہنگی کے فروغ میں اپنا مثبت کردار ادا کریں۔

وزیراعظم شہباز شریف کا عالمی یومِ برداشت پر قوم کے نام پیغام

اسلام آباد: دوسری جانب وزیراعظم شہباز شریف نے عالمی یومِ برداشت پر قوم کے نام پیغام میں کہا ہے کہ برداشت ہی معاشرتی استحکام، امن اور ہم آہنگی کی بنیاد ہے۔

انہوں نے کہا کہ عدم برداشت معاشرتی بگاڑ کا باعث بنتی ہے، اس لیے ہم سب کو مثبت رویے اپنانے ہوں گے تاکہ ایک صحت مند اور متوازن معاشرہ تشکیل دیا جا سکے۔

ان کا کہنا تھا کہ عالمی یومِ برداشت انسانیت کے بنیادی اقدار کو اجاگر کرنے کا دن ہے اور یہ یاد دلاتا ہے کہ باہمی احترام، رواداری اور برداشت ہی ایک مضبوط اور پُرامن معاشرے کی ضمانت ہیں۔

شہباز شریف نے کہا کہ پاکستان ہر سطح پر برداشت اور احترام کے فروغ کے لیے پوری طرح کوشاں ہے۔

وزیراعظم نے واضح کیا کہ رواداری بہتر معاشرے کی بنیاد ہے اور اسے اپنانا ہر فرد کی ذمہ داری ہے۔

انہوں نے انتہاپسندی اور نفرت انگیزی کی سخت مذمت کرتے ہوئے کہا کہ اس کا کسی مہذب معاشرے میں کوئی مقام نہیں۔

وزیراعظم نے اس بات پر زور دیا کہ برداشت کا فروغ ملکی ترقی، معاشرتی استحکام اور دیرپا امن کے لیے ناگزیر ہے، اور حکومت اس مقصد کے حصول کے لیے عملی اقدامات جاری رکھے گی۔