خارجی دہشت گرد کے فتنہ الخوارج سے متعلق ہوشربا انکشافات

ایک گرفتار خارجی دہشت گرد احسان اللہ ولد عبدالجنان قوم محسود نے سیکیورٹی اداروں کے سامنے اعتراف کیا ہے کہ فتنۂ خوارج مذہب کے نام پر نوجوانوں کو گمراہ کر کے پاک فوج کے خلاف اکساتا ہے۔

احسان اللہ نے بتایا کہ وہ کمانڈر بدری، مشتاق، گرینیڈ اور اسلام الدین کے لیے تین سال تک سہولت کاری کرتا رہا۔ اس دوران انہوں نے بکتر بند گاڑی اور تتور پولیس اسٹیشن پر حملے سمیت مختلف دہشت گردانہ کارروائیوں میں حصہ لیا۔

گرفتار دہشت گرد نے انکشاف کیا کہ خوارج تنظیم نوجوانوں کو دہشت گرد کارروائیوں میں استعمال کرنے کے ساتھ بدکاری جیسی غیر اخلاقی سرگرمیوں میں دھکیلتی ہے۔ انہوں نے مزید کہا کہ کچھ کمانڈر اپنے ذاتی مفادات کے لیے نوجوانوں کے ساتھ بداخلاقی رویہ اختیار کرتے ہیں۔

احسان اللہ نے اعتراف کیا کہ خوارج جھوٹ پھیلاتے تھے کہ پاک فوج کافر ہے، لیکن حقیقت میں پاک فوج کے جوان حقیقی مسلمان اور پنج وقتہ نمازی ہیں۔ انہوں نے بتایا کہ انہوں نے فوج کے ساتھ رہ کر نماز اور کلمہ سیکھے جو پہلے نہیں آتے تھے۔

گرفتار دہشت گرد نے نوجوانوں سے اپیل کی کہ وہ پاک فوج کا ساتھ دیں تاکہ دہشت گرد عناصر کی روک تھام اور خاتمہ ممکن ہو سکے۔ ان کے مطابق، خوارج کی وجہ سے وہ خود تباہ و برباد ہو گئے ہیں۔

سیکیورٹی اداروں کا کہنا ہے کہ مذہب کے نام پر نفرت اور دہشت پھیلانے والوں کے خلاف کارروائیاں جاری ہیں اور وہ ملک سے فتنۂ خوارج کے مکمل خاتمے کے لیے پُرعزم ہیں۔