بھارت سے جنگ کے بعد پاکستان کا اسٹینڈرڈ سب کے سامنے ہے اور مودی منہ چھپا رہا ہے: بلاول بھٹو

چیئرمین پیپلزپارٹی بلاول بھٹو نے کہا ہے کہ  بھارت سے جنگ کے بعد پاکستان کا اسٹینڈرڈ سب کے سامنے ہے اور مودی دنیا سے منہ چھپا رہا ہے۔

مظفرآباد میں ایک تقریب سے خطاب کرتے ہوئے بلاول بھٹو نے کہا کہ بھارت کے ساتھ جنگ کے بعد پاکستان کی صلاحیت اور اسٹیٹس پوری دنیا کے سامنے آ چکا ہے جبکہ مودی جنگ کے نتائج سے گھبرا کر دنیا سے منہ چھپا رہے ہیں۔

بلاول بھٹو نے کہا کہ جب عوام کا نمائندہ ان کی آواز نہ بنے تو لوگوں کو خود میدان میں آنا پڑتا ہے۔

انہوں نے کہا کہ کشمیر کے لوگ جب احتجاج کر رہے تھے تو فیصل راٹھور ان کے ساتھ کھڑے تھے، اور اب مظفرآباد میں فیصل راٹھور ہی عوام کی اصل نمائندگی کریں گے۔

چیئرمین پیپلزپارٹی نے کہا کہ ہم آزاد کشمیر کی حکومت بند کمروں میں بیٹھ کر نہیں چلائیں گے۔ فیصل راٹھور نے عوام سے جو وعدے کیے، وہ میرے پاس امانت ہیں اور ہم ان پر عمل کریں گے۔

انہوں نے کہا کہ پیپلزپارٹی کے مینڈیٹ پر ڈاکا ڈال کر عمران خان کو حکومت دی گئی تھی، مگر آزاد کشمیر اور گلگت بلتستان نے ہمیشہ پیپلزپارٹی کا ساتھ دیا۔ ان کے مطابق کشمیر کے عوام میں سب سے زیادہ سیاسی شعور پایا جاتا ہے۔

بلاول بھٹو نے مزید کہا کہ امریکا سمیت دنیا کے بڑے ممالک کو یاد ہے کہ جنگ میں بھارت کے سات جہاز گرائے گئے تھے۔ اسی وجہ سے بھارت ہر عالمی فورم سے بھاگ رہا ہے۔

انہوں نے کہا کہ مودی حکومت پاکستان اور کشمیر کے بھائی چارے کو نقصان پہنچانا چاہتی ہے، لیکن نہ وہ جنگ جیت سکے اور نہ اب ان کی سازشیں کامیاب ہوں گی۔