صدرِ مملکت سے اماراتی نامزد سفیر کی ملاقات، سلامتی اور دفاعی تعاون پر تبادلہ خیال

صدرِ مملکت آصف علی زرداری سے متحدہ عرب امارات کے نامزد سفیر سالم محمد سالم البواب الزعابی نے ایوانِ صدر میں ملاقات کی جس میں دونوں ملکوں کے درمیان تعلقات، تجارت، سرمایہ کاری، سلامتی اور دفاعی تعاون پر تفصیلی گفتگو ہوئی۔

اس موقع پر صدر آصف علی زرداری نے پاکستان اور متحدہ عرب امارات کے دیرینہ برادرانہ تعلقات کو سراہا۔

انہوں نے کہا کہ دونوں ممالک کے تعلقات باہمی اعتماد، تاریخی رشتوں اور خطے میں امن و خوشحالی کے مشترکہ وژن پر قائم ہیں۔ تجارت، سرمایہ کاری، انفراسٹرکچر، قابلِ تجدید توانائی اور ٹیکنالوجی میں باہمی تعاون مزید بڑھایا جائے۔

آصف علی زرداری نے سلامتی اور دفاع کے شعبوں میں تعاون کو مضبوط بنانے پر بھی زور دیا۔

ان کا کہنا تھا کہ نئے سفیر سالم الزعابی پاکستان اور امارات کے معاشی اور دفاعی تعلقات کو مزید بہتر سطح پر لے جائیں گے۔

اماراتی سفیر سالم الزعابی نے صدر کا شکریہ ادا کیا اور کہا کہ وہ دوستی، اقتصادی تعاون، سرمایہ کاری اور عوامی روابط کو بڑھانے کے لیے بھرپور کوشش کریں گے۔

انہوں نے کہا کہ امارات پاکستان کے ساتھ مضبوط اور دیرپا شراکت داری کو مزید وسعت دینا چاہتا ہے۔

ملاقات خوشگوار ماحول میں ہوئی اور دونوں نے مستقبل میں نئے تعاون کے مواقع تلاش کرنے پر اتفاق کیا۔

متحدہ عرب امارات کے سفیر سالم محمد سالم البواب الزعابی

سالم الزعابی ایک تجربہ کار سفارتکار اور دفاعی پس منظر رکھنے والے اعلیٰ عہدیدار ہیں۔ وہ امارات کی مسلح افواج میں میجر جنرل رہ چکے ہیں اور سکیورٹی، اسٹریٹجک پلاننگ اور بین الاقوامی تعاون میں وسیع تجربہ رکھتے ہیں۔

انہوں نے مختلف بین الاقوامی فورمز پر امارات کی نمائندگی کی ہے۔ علاقائی سلامتی، انسداد دہشت گردی اور دفاعی شراکت داری ان کے خصوصی شعبے رہے ہیں۔

پاکستان کے لیے ان کی تعیناتی کو دونوں ممالک کے درمیان دفاعی، تجارتی اور سرمایہ کاری تعلقات کو مزید مضبوط بنانے کی اہم پیش رفت سمجھا جا رہا ہے۔ ان کا کردار پاکستان اور امارات کے تاریخی برادرانہ تعلقات کو مزید مستحکم بنانے میں اہم تصور کیا جا رہا ہے۔