کراچی میں ای چالان سے بچنے کیلئے نمبر پلیٹ چھپانے والوں کیلئے خطرے کی گھنٹی بج گئی

کراچی میں ای چالان کے نظام کے نفاذ کے بعد کچھ شہری اپنی گاڑیوں اور موٹر سائیکل کی نمبر پلیٹس چھپانے لگے ہیں تاکہ جرمانے سے بچ سکیں۔

سندھ پولیس نے اس پر فوری سخت کارروائی کا آغاز کر دیا ہے۔ ترجمان سندھ پولیس کے مطابق اس آپریشن میں وہ تمام گاڑیاں شامل ہوں گی جن کی نمبر پلیٹس چھپی ہوئی، ناقابل شناخت یا غیر قانونی ہوں۔

پولیس نے واضح کیا کہ نمبر پلیٹ چھپانا سنگین قانونی خلاف ورزی ہے۔ اس پر بھاری جرمانہ کے ساتھ ایف آئی آر بھی درج ہو سکتی ہے۔

ڈیجیٹل میڈیا سیل (DMC) کے مطابق بغیر نمبر پلیٹ یا چھپی ہوئی نمبر پلیٹ والی گاڑی قانونی شناخت سے محروم سمجھی جائے گی۔ اس کے باعث ٹریفک پولیس کو انہیں فوری ضبط کرنے کا اختیار حاصل ہوگا۔

ایڈیشنل آئی جی کراچی جاوید عالم اوڈھو نے شہریوں سے اپیل کی کہ اپنی گاڑیوں پر واضح اور قانونی نمبر پلیٹس لگائیں۔ انہوں نے کہا کہ بغیر نمبر پلیٹ گاڑی چلانا نہ صرف قانونی بلکہ عوامی نظم کے خلاف بھی ہے اور شہر کی مجموعی شبیہ پر اثر انداز ہوتا ہے۔

پولیس نے خبردار کیا کہ جو بھی شہری نمبر پلیٹ چھپانے یا ہٹانے میں ملوث پایا گیا، اس کے خلاف سخت کارروائی کی جائے گی اور گاڑی ضبط ہونے کا امکان بھی ہے۔

یہ آپریشن صرف چالان کے لیے نہیں بلکہ کراچی میں ٹریفک نظم و ضبط بہتر بنانے، روڈ سیفٹی کو یقینی بنانے اور ناقابل شناخت گاڑیوں کے غلط استعمال کو روکنے کے لیے کیا جا رہا ہے۔