پاکستان کی بحری تاریخ میں ایک اور سنگِ میل عبور

کراچی – پاکستان نے بحری شعبے میں ایک بڑی کامیابی حاصل کر لی ہے۔

کراچی پورٹ سے پہلی بار ماحول دوست میرین فیول کی بڑے پیمانے پر پیداوار اور ترسیل مکمل کر لی گئی ہے۔ اس طرح پاکستان نے پہلی بار بین الاقوامی تنظیم برائے بحری امور (IMO) کے سخت معیار پر پورا اتر کر ایک اہم سنگ میل عبور کیا ہے۔

حکام کے مطابق انتہائی کم سلفر والا فیول آئل (VLSFO) اب پاکستان میں نہ صرف تیار کیا جا رہا ہے بلکہ اسے باقاعدہ طریقے سے ترسیل بھی کیا جا رہا ہے۔ اس کامیابی کے ساتھ پاکستان ماحول دوست ایندھن کی عالمی فہرست میں شامل ہو گیا ہے۔

ترسیل ویٹول کی سنگاپور کی بنکر بارج کے ذریعے کی گئی، جو 8,722 میٹرک ٹن وزن رکھتی ہے۔ یہ پاکستان میں اس نوعیت کی سب سے بڑی ترسیل ہے۔ اس پیش رفت سے پاکستان کی توانائی پیداوار کے شعبے میں ایک نیا اور مثبت باب کھل گیا ہے۔

وزیراعظم کی ٹاسک فورس برائے بحری امور، کراچی پورٹ، اور حکومت کے دیگر اداروں نے مشترکہ طور پر اس منصوبے کو کامیاب بنایا۔ حکام کا کہنا ہے کہ یہ کامیابی مقامی سطح پر ماحول دوست میرین ایندھن کی مستقل پیداوار اور ترسیل کا آغاز ثابت ہوگی۔

اس سے پہلے ویٹول نے بحری شعبے میں مختلف تعاون کے مواقع کا جائزہ لیا تھا، جن میں بارج آپریشنز بھی شامل ہیں۔ اس نئے سنگ میل سے پاکستان خطے میں میرین فیول کے ایک قابل اعتماد سپلائر کے طور پر ابھر سکتا ہے۔