محکمہ موسمیات نے بارشوں کی پیشگوئی کردی

محکمہ موسمیات نے اگلے ماہ لاہور میں بارشوں کی پیشگوئی کردی ہے۔

لاہور میں اسموگ کی صورتحال بدستور تشویشناک ہے۔ مختلف علاقوں میں ایئر کوالٹی انڈیکس ایک بار پھر خطرے کی حد سے تجاوز کر گیا۔ کئی بستیوں میں یہ شرح 400 سے بھی اوپر ریکارڈ کی گئی، جو صحت کے لیے نہایت مضر سمجھی جاتی ہے۔

ماہرین کا کہنا ہے کہ ٹریفک کا دباؤ، فصلوں کی باقیات جلانے اور خشک موسم نے آلودگی میں اضافے کا باعث بنایا ہے۔ اسپتالوں میں آنکھوں اور سانس کی تکلیف کے مریضوں کی تعداد بھی بڑھ رہی ہے۔

پنجاب کے دوسرے شہروں میں بھی صورتحال بہتر نہیں۔ گوجرانوالہ، گجرات اور ملتان میں فضا بھاری اور دھواں زدہ محسوس ہو رہی ہے۔ شہریوں کو صبح اور رات کے اوقات میں زیادہ مشکلات کا سامنا ہے۔

محکمہ موسمیات کے مطابق دسمبر کے آغاز میں بارشیں متوقع ہیں۔ اگر بارش ہوئی تو فضا میں موجود آلودگی میں کمی آنے کی امید ہے۔ محکمہ نے اگلے ایک ہفتے تک ملک بھر میں موسم سرد اور خشک رہنے کی پیشگوئی بھی کی ہے۔

اسلام آباد میں بھی خشک سردی برقرار رہے گی۔ پنجاب کے میدانی علاقوں میں اسموگ مزید بڑھ سکتی ہے جبکہ کہیں کہیں ہلکی دھند بھی چھا سکتی ہے۔ مری، گلیات اور قریبی مقامات میں سردی کی شدت میں اضافہ ہوگا۔

خیبرپختونخوا کے میدانی اضلاع میں موسم خشک رہے گا۔ پہاڑی علاقوں میں سرد ہوائیں چلنے کا امکان ہے۔ سندھ میں بھی موسم خشک رہے گا جبکہ بلوچستان کے بیشتر علاقوں میں دن کے وقت خشک اور رات کو ٹھنڈ بڑھے گی۔