کراچی پر 17سالہ قبضہ ختم ہونا چاہیے، خالد مقبول صدیقی

ایم کیو ایم پاکستان کے کنوینر خالد مقبول صدیقی نے کہا ہے کہ کراچی کے مستقبل پر "شب خون” مارا جا رہا ہے۔

کراچی میں پریس کانفرنس کرتے ہوئے خالد مقبول صدیقی نے کہا کہ اگر زیادتیوں کا سلسلہ بند نہ ہوا تو وہ عدالتوں کا دروازہ کھٹکھٹائیں گے اور ہر فورم پر قانونی چارہ جوئی کریں گے۔ ان کا کہنا تھا کہ کراچی پر پچھلے 17 سال سے قائم قبضہ ختم ہونا چاہیے۔

انہوں نے کہا کہ حیدر آباد میں 77 سال بعد ایم کیو ایم کی کوششوں سے پہلی یونیورسٹی بنی، جبکہ کراچی میں جامعہ کراچی کے بعد کوئی نئی یونیورسٹی نہیں بنائی گئی۔ انہوں نے جاگیرداروں اور خود کو جمہوریت کے چیمپئن کہنے والی جماعتوں کو بلدیاتی حکومتوں کی راہ میں سب سے بڑی رکاوٹ قرار دیا۔

ان کا کہنا تھا کہ آئین واضح طور پر کہتا ہے کہ آبادی بڑھنے پر نئے صوبے قائم کیے جاسکتے ہیں، مگر ہمارے صرف دو آئینی مطالبات پر شور مچایا جا رہا ہے۔ انہوں نے کہا کہ حکمرانوں نے آئین پر عمل کرنے یا نہ کرنے کو اپنی مرضی بنا لیا ہے۔ خالد مقبول کے مطابق بلدیاتی حکومتوں کا قیام آئینی حکم ہے اور اس پر عمل نہ کرنا ’’غداری‘‘ کے مترادف ہے۔

انہوں نے کہا کہ اگر ضرورت پڑی تو کراچی کا مقدمہ سڑکوں پر بھی لڑا جائے گا۔ ان کا دعویٰ تھا کہ ایم کیو ایم کے مطالبات پارٹی کے لیے نہیں بلکہ پورے صوبے اور ملک کے لیے ہیں۔ انہوں نے کہا کہ کراچی میں 18ویں ترمیم پر مکمل عملدرآمد ہونا ضروری ہے کیونکہ پاکستان میں عملاً جاگیردارانہ طرز حکومت چل رہی ہے۔

خالد مقبول نے مزید کہا کہ کراچی انفرااسٹرکچر ڈیولپمنٹ اب پورے پاکستان کی ترقی سے جڑا ہوا ہے، اس لیے 17 سال سے قائم ’’جعلی حکومت‘‘ کا خاتمہ ضروری ہے۔

گورنر سندھ کامران ٹیسوری نے کہا کہ وہ پہلے ایم کیو ایم کے کارکن ہیں، بعد میں گورنر ہیں۔ انہوں نے کہا کہ ایم کیو ایم اپنے کارکنوں کو گورنر، چیئرمین، میئر، ایم پی اے اور ایم این اے بناتی ہے۔

کامران ٹیسوری نے اعتراف کیا کہ کراچی کا سیوریج سسٹم شدید تباہی کا شکار ہے، سڑکیں ٹوٹ پھوٹ کا شکار ہیں اور کوئی پوچھنے والا نہیں۔ انہوں نے کہا کہ خالد مقبول نے وہ تمام باتیں کی ہیں جو کراچی کے عوام کے دل کی آواز ہیں۔

گورنر سندھ نے کہا کہ یہ مسئلہ صرف کراچی کا نہیں بلکہ سندھ بھر کا مقدمہ ہے۔ انہوں نے بتایا کہ ایم کیو ایم پاکستان نے کراچی اور حیدر آباد کے لیے لڑ کر ترقیاتی پیکیج حاصل کیا اور جو فنڈز ملے وہ کسی ایم این اے کی مہربانی نہیں بلکہ پارٹی کی جدوجہد کا نتیجہ ہیں۔