کرپشن ملکی ترقی کی سب سے بڑی رکاوٹ، وزارت خزانہ کی رپورٹ میں انکشاف

اسلام آباد: وزارت خزانہ نے گورننس اینڈ کرپشن ڈائیگناسٹک اسیسمنٹ رپورٹ جاری کر دی ہے، جس میں پاکستان میں کرپشن کے سنگین اثرات اور بنیادی اصلاحات کی ضرورت پر زور دیا گیا ہے۔

رپورٹ کے مطابق کرپشن ملکی معاشی و سماجی ترقی میں سب سے بڑی رکاوٹ ہے۔

رپورٹ میں یہ انکشاف کیا گیا ہے کہ ٹیکس نظام، سرکاری اخراجات، عدالتی نظام اور احتساب کے عمل میں خامیاں ملک کی ترقی میں رکاوٹ بن رہی ہیں۔ عدالتی نظام میں سنگین خامیوں کی نشاندہی کی گئی ہے جبکہ طاقتور گروہوں کی کرپشن کو سب سے خطرناک قرار دیا گیا ہے۔

وزارت خزانہ کے مطابق کرپشن کی وجہ سے سرکاری خرچ غیر مؤثر، ٹیکس کی وصولی کم اور عدالتی اداروں پر عوام کا اعتماد متاثر ہوا ہے۔ غیر مستقل اور غیر منصفانہ احتساب نے عوام میں اداروں کے تئیں اعتماد کو کم کر دیا ہے۔

رپورٹ میں سفارش کی گئی ہے کہ نیب سمیت تمام اینٹی کرپشن اداروں کو بااختیار اور جدید بنایا جائے تاکہ مؤثر احتساب کو یقینی بنایا جا سکے۔

ماہرین کے مطابق سفارشات پر عمل درآمد سے ملک کی جی ڈی پی میں 5 سے 6.5 فیصد اضافہ ممکن ہے۔

رپورٹ میں یہ بھی کہا گیا ہے کہ معاشی پالیسی سازی میں اسٹیک ہولڈرز کی شمولیت نہ ہونے کے برابر ہے اور حکومتی فیصلہ سازی میں شفافیت کی کمی سنگین مسئلہ ہے۔

وزارت خزانہ نے واضح کیا کہ کرپشن منصفانہ مقابلے اور سرمایہ کاری کے مواقع میں رکاوٹ ہے اور گورننس کی کمزوریاں اس مسئلے کو مزید بڑھاتی ہیں۔

یہ رپورٹ ایسے وقت میں جاری کی گئی ہے جب پاکستان آئی ایم ایف ایگزیکٹیو بورڈ اجلاس کی تیاری کر رہا ہے، جس کے تحت قرض اور مالی مدد کے حوالے سے اہم فیصلے ہونے ہیں۔