الیکشن کمیشن نے سہیل آفریدی کے ہری پور ضمنی انتخاب سے متعلق غیر ذمہ دارانہ بیان کا نوٹس لے لیا

الیکشن کمیشن نے خیبر پختونخوا کے وزیراعلیٰ کی جانب سے سرکاری ملازمین کو مبینہ دھمکیاں دینے پر شدید تشویش کا اظہار کیا ہے۔ کمیشن نے وزارتِ دفاع اور وزارتِ داخلہ کے سیکرٹریز سے معاملے کا فوری نوٹس لینے کی درخواست کر دی ہے۔

الیکشن کمیشن کے ترجمان کے مطابق وزیراعلیٰ کے غیر ذمہ دارانہ رویے کے باعث ہری پور کے حلقہ این اے 18 میں ضمنی انتخاب کا انعقاد مشکل ہوتا دکھائی دے رہا ہے۔ ضلعی انتظامیہ، پولیس، انتخابی عملے اور ووٹرز کی جانوں کو خطرات لاحق ہو چکے ہیں۔

ترجمان نے ہدایت کی کہ ڈسٹرکٹ ریٹرننگ آفیسر، ریٹرننگ آفیسر، پریزائیڈنگ افسران اور تمام انتخابی عملے کو مکمل تحفظ فراہم کیا جائے۔ پولنگ اسٹیشن جاتے وقت اور الیکشن کے بعد آر او آفس واپسی تک سخت سیکیورٹی یقینی بنائی جائے۔ الیکشن مواد کی نقل و حرکت کے دوران بھی فول پروف سیکیورٹی فراہم کرنا ضروری قرار دیا گیا ہے۔

الیکشن کمیشن نے چیف سیکرٹری خیبر پختونخوا کو بھی خط لکھا ہے جس میں کہا گیا ہے کہ وزیراعلیٰ سہیل آفریدی این اے 18 میں امیدوار کی الیکشن مہم کا حصہ بنے، جو الیکشن قوانین کی خلاف ورزی ہے۔ خط کے مطابق امیدوار، عمر ایوب کی اہلیہ ہیں اور وزیراعلیٰ کا مہم میں شامل ہونا الیکشن ایکٹ کے منافی ہے۔

مزید کہا گیا کہ وزیراعلیٰ کی تقریر میں دھمکی آمیز زبان استعمال کی گئی اور اس دوران مفرور ملزم عمر ایوب بھی ان کے ساتھ موجود تھا۔ الیکشن کمیشن نے چیف سیکرٹری اور آئی جی کو ہدایت کی ہے کہ وہ صوبائی الیکشن کمشنر سے فوری ملاقات کریں اور صورتحال پر جامع رپورٹ کمیشن کو فراہم کریں۔

سیکرٹری الیکشن کمیشن نے سیکرٹری داخلہ اور سیکرٹری دفاع کو بھی الگ خطوط لکھے ہیں۔ ان میں مؤقف اختیار کیا گیا ہے کہ وزیراعلیٰ کے اقدامات سے الیکشن افسران کی جانوں کو خطرہ لاحق ہو گیا ہے، لہٰذا معاملے کا فوراً نوٹس لیا جائے۔

الیکشن کمیشن نے سفارش کی ہے کہ حلقہ این اے 18 میں 23 نومبر کو امن و امان برقرار رکھنے کے لیے سول آرمڈ فورسز اور پاک فوج تعینات کی جائے، تاکہ ضمنی انتخاب پر امن ماحول میں مکمل کیا جا سکے۔