350 فیصد ٹیرف کی دھمکی سے پاک–بھارت جنگ رکوا دی، ٹرمپ کا نیا دعویٰ

واشنگٹن: امریکی صدر ڈونلڈ ٹرمپ نے نیا دعویٰ کیا ہے کہ انہوں نے 350 ٹیرف کی دھمکی سے پاک–بھارت جنگ رکوا دی۔

سعودی بزنس فورم سے خطاب کرتے ہوئے امریکی صدر ڈونلڈ ٹرمپ نے کہا کہ پاکستان اور بھارت کے درمیان ممکنہ جنگ کو سفارتی دباؤ اور سخت اقتصادی انتباہ کے ذریعے روکا، دونوں ممالک اُس وقت ایٹمی تصادم کے قریب کھڑے تھے۔

ٹرمپ کے مطابق انہوں نے بھارت اور پاکستان دونوں کو واضح پیغام بھیجا کہ اگر جنگ سے پیچھے نہ ہٹے تو امریکا 350 فیصد ٹیرف عائد کرے گا اور دونوں ممالک کی امریکی منڈیوں تک رسائی محدود کر دی جائے گی۔

انہوں نے کہا کہ ان کے مشیروں نے انہیں اس طرز کا اقدام اٹھانے سے روکا، مگر وہ ’’لاکھوں جانیں بچانے‘‘ کے لیے یہ قدم اٹھانے کے لیے تیار تھے۔

ان کا کہنا تھا کہ انہیں خدشہ تھا کہ ایٹمی تصادم کی صورت میں خطے سمیت دنیا بھر میں تباہ کن اثرات مرتب ہوں گے، حتیٰ کہ ’’نیوکلئیر ڈسٹ لاس اینجیلس تک پہنچ سکتی تھی‘‘۔

امریکی صدر کے مطابق شدید دباؤ کے بعد بھارتی وزیراعظم نے انہیں فون کر کے صورتحال کو جنگ سے دور رکھنے کا یقین دلایا۔

ٹرمپ نے دعویٰ کیا کہ پاکستانی وزیراعظم شہباز شریف نے بھی ان سے رابطہ کر کے شکریہ ادا کیا اور کہا کہ ان کی مداخلت سے بے شمار جانیں بچ گئیں۔

امریکی صدر اس سے پہلے بھی کئی مرتبہ پاک–بھارت کشیدگی کم کرانے میں اپنے کردار کا ذکر کر چکے ہیں، اور گزشتہ روز بھی انہوں نے دعویٰ کیا تھا کہ ’’دنیا کی آٹھ بڑی ممکنہ جنگیں‘‘ رکوانے میں ان کا ہاتھ ہے۔