کراچی میں پورشنز خرید و فروخت والوں کیلئے بڑی خبر؛ اہم اعلان ہوگیا

کراچی میں غیرقانونی پورشنز اور غیر مجاز فلورز کی خرید و فروخت پر سخت پابندی لگا دی گئی ہے۔ یہ فیصلہ ضلع شرقی اور جنوبی کی انتظامیہ نے بڑھتی ہوئی غیرقانونی تعمیرات کو روکنے کے لیے کیا ہے۔

 حکام کے مطابق کئی علاقوں میں رہائشی پلاٹوں پر اضافی منزلیں اور غیرقانونی حصے بنا کر فروخت کیے جا رہے تھے۔ جاری کردہ احکامات کے مطابق گلستان جوہر، جمشید روڈ، پی آئی بی کالونی، سولجر بازار، پی ای سی ایچ ایس، محمود آباد اور گلشن اقبال میں ایسی خلاف ورزیاں زیادہ نوٹ کی گئی ہیں۔ اسی طرح ضلع جنوبی کے لیاری، گارڈن اور اولڈ سٹی ایریا میں بھی غیرقانونی تعمیرات کے معاملات سامنے آئے ہیں۔

ڈپٹی کمشنرز نے بتایا کہ کچھ رئیل اسٹیٹ ایجنٹس اور پراپرٹی ڈیلرز ان غیرقانونی حصوں کی خرید و فروخت کو فروغ دے رہے تھے، جس سے شہری مشکلات کا شکار ہو رہے ہیں۔ انتظامیہ نے واضح کیا کہ یہ عمل نہ صرف قوانین کی خلاف ورزی ہے بلکہ قابل سزا جرم بھی ہے۔ عدالت عالیہ بھی ایسے پورشنز اور اضافی منزلوں کو غیرقانونی قرار دے چکی ہے۔

رئیلٹرز کو خبردار کیا گیا ہے کہ وہ غیرمجاز منزلیں یا غیرقانونی پورشنز بیچنے، خریدنے یا ان کے اشتہارات چلانے سے باز رہیں۔ خلاف ورزی کی صورت میں گرفتاری سمیت سخت قانونی کارروائی کی جائے گی۔ اس کے علاوہ سب رجسٹرار کو بھی ہدایت کی گئی ہے کہ ایسی پراپرٹیز کی نہ سب لیز کریں اور نہ ہی کوئی رجسٹری قبول کریں۔