حکومت نے جولائی تا اکتوبر 650 ارب روپے قرض لیا، گزشتہ سال کے مقابلے میں 35 فیصد اضافہ

اسلام آباد: اقتصادی امور ڈویژن کی دستاویز کے مطابق رواں مالی سال کے پہلے چار ماہ میں حکومت نے 650 ارب روپے کا قرض حاصل کیا، جو گزشتہ مالی سال کے اسی عرصے کے مقابلے میں 170 ارب روپے زیادہ ہے۔ گزشتہ سال جولائی تا اکتوبر 480 ارب روپے قرض لیا گیا تھا۔

دستاویز کے مطابق جولائی میں 198 ارب، اگست میں 192 ارب، ستمبر میں 24 ارب جبکہ اکتوبر میں 133 ارب روپے کا قرض حاصل کیا گیا۔

غیر ملکی قرضوں کے حوالے سے اکتوبر میں 47 کروڑ 12 لاکھ ڈالر کا قرض موصول ہوا، جو ستمبر کے مقابلے میں 4 کروڑ ڈالر زیادہ ہے۔

باہمی اور کثیرالجہتی معاہدوں کے تحت 27 کروڑ 80 لاکھ ڈالر جبکہ نئے پاکستان سرٹیفکیٹس کے ذریعے 19 کروڑ 31 لاکھ ڈالر حاصل ہوئے، سعودی آئل فیسیلیٹی کے تحت اکتوبر میں 10 کروڑ ڈالر موصول ہوئے۔

سعودی آئل فیسیلیٹی سے رواں مالی سال مجموعی طور پر 1 ارب ڈالر ملنے کا اندازہ ہے، جبکہ اب تک 40 کروڑ ڈالر موصول ہو چکے ہیں۔

دستاویز میں بتایا گیا ہے کہ رواں مالی سال 25 ارب ڈالر سے زیادہ قرض لینے کا ہدف مقرر کیا گیا ہے، جبکہ دوست ممالک سے 12 ارب ڈالر رول اوور کروانے کا پلان بھی شامل ہے۔

آئی ایم ایف پروگرام کے تحت پاکستان کو 2 ارب ڈالر کی قسط ملنے کا امکان ہے، آر ایس ایف پروگرام کے تحت 40 کروڑ ڈالر کی دو اقساط شامل ہیں۔

آئی ایم ایف ایگزیکٹو بورڈ کا اجلاس 8 اکتوبر کو ہوگا، اور اسٹاف لیول معاہدے کی منظوری کے بعد 1.2 ارب ڈالر کی رقم 9 اگست تک پاکستان کو ملنے کی توقع ہے۔