کوئٹہ: وزیراعلیٰ سرفراز بگٹی کو ہٹانے کی افواہوں کے پس پردہ حقائق سامنے آ گئے

بلوچستان میں وزیر اعلیٰ سرفراز بگٹی کو ہٹانے کی افواہوں کے پس پردہ حالات منظر عام پر آ گئے ہیں۔

اطلاعات کے مطابق یہ خبریں سیاسی تبدیلی یا حکومتی سازش کا نتیجہ نہیں بلکہ ذاتی اور سیاسی اختلافات کی عکاس ہیں۔

ذرائع کے مطابق مسلم لیگ (ن) کے سینیٹر میر دوستین خان ڈومکی، جو ترقیاتی فنڈز میں اضافے کے حوالے سے وزیر اعلیٰ سے ناراض تھے، نے سرفراز بگٹی کے خلاف بیان دیا تھا۔

سینیٹر ڈومکی نے اپنی ترقیاتی اسکیموں کے لیے اضافی فنڈز کا مطالبہ کیا تھا، تاہم وزیراعلیٰ نے قواعد و ضوابط کی وجہ سے اس پر عمل کرنے سے انکار کیا۔ پیپلز پارٹی کے ذرائع کے مطابق یہ مطالبہ سرکاری اصولوں کے خلاف تھا۔

اس سلسلے میں سینیٹر ڈومکی نے وزیراعظم کو بھی وزیر اعلیٰ کے رویے سے آگاہ کیا، لیکن وزیراعلیٰ نے اصل صورتحال کی وضاحت کر دی تھی۔

اسی طرح پیپلز پارٹی کے رکن اسمبلی لیاقت لہڑی بھی مبینہ طور پر وزیر اعلیٰ سے ناراض تھے، ان کا اختلاف گرین بس سروس منصوبے کی پبلک پرائیویٹ پارٹنرشپ کے طریقہ کار پر تھا۔

ذرائع کے مطابق وہ منصوبے کے ٹھیکے کے لیے اپنی پسند کی کمپنی کو ترجیح دینا چاہتے تھے، لیکن وزیراعلیٰ نے ان کے مطالبات منظور نہیں کیے۔

حالیہ دنوں میں سینیٹر دوستین ڈومکی کے بیانات نے سیاسی ہلچل پیدا کی تھی، تاہم حقائق سامنے آنے کے بعد واضح ہوا کہ معاملہ حکومت کی تبدیلی سے نہیں بلکہ سیاسی اور انتظامی اختلافات سے متعلق تھا۔