بینظیر انکم سپورٹ پروگرام میں رجسٹرڈ شہریوں کیلئے بڑی خبر آگئی

بینظیر انکم سپورٹ پروگرام (BISP) نے اپنے رجسٹرڈ شہریوں کے لیے انتباہ جاری کر دیا ہے۔

 پروگرام کے حکام نے کہا ہے کہ موبائل فون پر موصول ہونے والے ایسے پیغامات یا کالز جن میں رقم کی ادائیگی کے لیے نمبر پر رابطہ کرنے یا ذاتی معلومات فراہم کرنے کو کہا جائے، مکمل طور پر جعلی اور دھوکہ دہی ہیں۔

بی آئی ایس پی کی طرف سے واضح کیا گیا کہ پروگرام کے تمام پیغامات صرف نمبر 8171 سے موصول ہوتے ہیں۔ شہریوں سے اپیل کی گئی کہ وہ اس کے علاوہ کسی بھی نمبر پر اعتماد نہ کریں اور کسی بھی غیر متعلقہ درخواست کا جواب نہ دیں۔

اسی سلسلے میں بی آئی ایس پی نے رجسٹرڈ شہریوں کے لیے نیا نظام ’سوشل پروٹیکشن والٹس‘ متعارف کروایا ہے۔ چیئرپرسن سینیٹر روبینہ خالد نے بتایا کہ اس نظام کا مقصد ادائیگی کے عمل کو مزید شفاف اور آسان بنانا ہے۔

سوشل پروٹیکشن والٹس کے تحت رجسٹرڈ خواتین کو مفت سم کارڈز فراہم کیے جائیں گے۔ خواتین اپنے اصل شناختی کارڈ اور موبائل فون کے ساتھ قریبی BISP دفتر یا کیمپ میں جائیں گی۔ بایومیٹرک تصدیق کے بعد انہیں ایک مفت سم ملے گی، جس پر ان کا سوشل پروٹیکشن والیٹ فعال کیا جائے گا۔

سینیٹر روبینہ خالد نے تاکید کی کہ سم حاصل کرنے کے لیے کسی کو رقم نہ دیں۔ یہ سہولت بالکل مفت ہے اور صرف BISP کی جانب سے فراہم کی جائے گی۔ مستقبل میں تمام ادائیگیاں اسی سوشل پروٹیکشن والیٹ کے ذریعے کی جائیں گی اور پیغامات بھی اسی سم پر موصول ہوں گے۔