پنجاب میں ٹاپ لیول پر کرپشن ممکن نہیں؛ مریم نواز

لاہور: وزیرِ اعلیٰ پنجاب مریم نواز نے کہا ہے کہ پنجاب میں ٹاپ لیول پر کرپشن ممکن نہیں۔

وزیر اعلیٰ پنجاب مریم نواز سے نیشنل ڈیفنس یونیورسٹی (این ڈی یو) کے 27 ویں نیشنل سیکیورٹی ورکشاپ کے شرکا نے ملاقات کی، جہاں وزیر اعلیٰ نے وفد کا خیر مقدم کیا اور پنجاب حکومت کے عوامی فلاح و بہبود کے منصوبوں پر تفصیلی بریفنگ دی۔

مریم نواز نے شرکا کے مختلف سوالات کے جوابات دیتے ہوئے کہا کہ پنجاب میں متعدد شعبوں میں نمایاں اصلاحات متعارف کروائی جا رہی ہیں۔ انہوں نے کہا کہ ’’پنجاب میں بہت کچھ کر چکے ہیں اور بہت کچھ ہونے جا رہا ہے‘‘۔ وزیر اعلیٰ کا کہنا تھا کہ وسائل کی غیر منصفانہ تقسیم مسائل کو جنم دیتی ہے، جبکہ احتساب نہ ہونے کے باعث پبلک سیکٹر میں کارکردگی صفر ہو جاتی ہے۔

اسموگ کنٹرول کے حوالے سے مریم نواز نے بتایا کہ صوبائی حکومت نے انتھک محنت کی، تاہم سرحد پار فصلیں جلانے سے لاہور متاثر ہوتا ہے۔ انہوں نے واضح کیا کہ پنجاب میں میرٹ کی خلاف ورزی برداشت نہیں کی جاتی اور نہ ہی سیاسی بنیادوں پر بھرتیاں کی گئی ہیں۔ ’’اگر کوئی ثابت کر دے کہ میں نے سفارش کی ہے تو استعفیٰ دینے کو تیار ہوں‘‘۔

وزیر اعلیٰ نے کہا کہ نچلی سطح پر کرپشن کا مکمل خاتمہ ممکن نہ بھی ہو، مگر ٹاپ لیول پر اب کرپشن ناممکن ہے۔ گندم نہ خریدنے کے حکومتی فیصلے پر تنقید کا جواب دیتے ہوئے انہوں نے کہا کہ اس پالیسی سے کسان نہیں بلکہ مڈل مین فائدہ اٹھاتا ہے، تاہم پنجاب واحد صوبہ ہے جہاں آٹا، گندم اور روٹی کی قیمتیں نہیں بڑھیں۔

مریم نواز نے بتایا کہ صوبے میں مہنگائی کی شرح 40 فیصد سے کم ہو کر 4 فیصد تک آ گئی ہے، جس سے غریب آدمی کا کچن آسانی سے چل رہا ہے۔ انہوں نے کہا کہ ناکامیوں کا ملبہ بیوروکریسی یا دوسروں پر ڈالنا ان کی فطرت نہیں۔

صحت کے شعبے میں اقدامات بتاتے ہوئے وزیر اعلیٰ نے کہا کہ پنجاب میں جدید برن اسپتال اور آرتھوپیڈک اسپتال قائم کیے جا رہے ہیں جبکہ پاکستان کا پہلا سرکاری کینسر اسپتال بھی پنجاب میں بنے گا۔

انہوں نے کہا کہ تندور جا کر روٹی چیک کرنے پر مذاق بنایا گیا، مگر دفتر میں بیٹھ کر حالات کا اندازہ نہیں لگایا جا سکتا۔

ایک صحافی کی تنقید کے جواب میں انہوں نے کہا کہ ’’تنقید کرنے والے صحافی کی اہلیہ بھی پنجاب کو محفوظ قرار دیتی ہیں‘‘۔

وفد کے شرکا نے پنجاب حکومت کے فلاحی اقدامات کی تعریف کی اور سیکیورٹی و گورننس کے حوالے سے کیے جانے والے فیصلوں کو سراہا۔