بڑی خوشخبری؛ سرکاری ملازمین کی تنخواہوں سے متعلق اہم اعلان ہوگیا

اسلام آباد میں ایف بی آر ہیڈکوارٹرز میں چیئرمین ایف بی آر کی زیرصدارت ہونے والے بورڈ اِن کونسل کے اجلاس میں ان لینڈ ریونیو افسران کے لیے انعامی حد میں اضافے کی منظوری دے دی گئی ہے۔

اجلاس میں فیصلہ کیا گیا کہ محنتی اور شاندار کارکردگی دکھانے والے افسران کے لیے انعام کی زیادہ سے زیادہ حد 18 تنخواہوں سے بڑھا کر 24 تنخواہیں سالانہ کر دی جائیں۔

اس ضمن میں ان لینڈ ریونیو ریوارڈ رولز 2021 میں اہم ترامیم کی گئیں، جن کے تحت نہ صرف نئی حد مقرر کی گئی بلکہ نان کیڈر افسران اور عملے کے لیے بھی نیا جائزہ نظام متعارف کروایا گیا۔ اجلاس میں بتایا گیا کہ بی ایس 16 اور اس سے اوپر کے ایکس کیڈر افسران اور بی ایس 1 تا 15 کے اسٹاف کو کارکردگی کی بنیاد پر مختلف کیٹیگریز میں تقسیم کیا جائے گا۔ سہ ماہی انعامات کے لیے سینئر اراکین کی مشترکہ رپورٹنگ کے ذریعے ایک جائزہ نظام بھی وضع کیا جائے گا۔

کچھ اراکین نے اسیسمنٹ کمیٹی کی تشکیل پر نظرثانی کی تجویز دی، تاہم چیئرمین اور اکثریت نے موجودہ طریقہ کار کی حمایت کی۔ فیصلہ کیا گیا کہ پورا نظام آئی ٹی بیسڈ ہو گا اور پی آر اے ایل کو ہدایت دی گئی ہے کہ سات دن میں ڈیجیٹل فریم ورک فعال کیا جائے۔

اجلاس میں مزید بتایا گیا کہ کسٹمز ریوارڈ رولز 2012 پہلے ہی 36 ماہ کی بنیادی تنخواہ تک انعام کی اجازت دیتے ہیں، اس لیے ان میں کسی ترمیم کی ضرورت نہیں۔ بورڈ نے کیڈر افسران کو انعامی ڈھانچے سے نکالنے کی تجویز مسترد کر دی، تاہم ان کی غیر معمولی کارکردگی کے لیے خصوصی انعامی نظام پر آئندہ اجلاس میں غور کیا جائے گا۔