ہفتہ، 29-نومبر،2025
ہفتہ 1447/06/08هـ (29-11-2025م)

بنوں ریجن میں بڑی کامیابی: 17 دہشتگرد ہلاک، اہم کمانڈرز کا خاتمہ

22 نومبر, 2025 13:24

خیبرپختونخوا کے بنوں ریجن میں پولیس، سی ٹی ڈی، کوئیک رسپانس فورس اور سیکیورٹی فورسز نے کامیاب آپریشنز کیے ہیں۔

ان کارروائیوں میں 17 دہشتگرد مارے گئے، جن میں 3 اہم کمانڈرز بھی شامل ہیں، جبکہ کئی دہشتگرد زخمی ہوئے۔ آپریشنز میں پولیس اور فورسز کا کوئی جانی نقصان نہیں ہوا۔

پہلا بڑا آپریشن شیری خیل اور پکہ پہاڑ خیل کے علاقوں میں کیا گیا۔ جس کے دوران فورسز کا سامنا فتنہ الخوارج کے مسلح گروہوں سے ہوا۔ آپریشن میں 10 دہشتگرد ہلاک ہوئے، 5 زخمی ہوئے اور ایک سہولت کار گرفتار کیا گیا۔

فورسز کو سات دہشتگردوں کی لاشیں مل گئیں، جبکہ تین لاشیں دشوار گزار پہاڑی راستوں کی وجہ سے تاحال نہیں نکالی جا سکیں۔

ہلاک ہونے والوں میں دو خطرناک کمانڈرز بھی شامل ہیں:

  • نیاز علی عرف اکاشا
  • عبداللہ عرف شپونکوئی

یہ دونوں پولیس اور سیکیورٹی فورسز کو طویل عرصے سے مطلوب تھے۔

اس کے بعد نصر خیل کے علاقے میں بھی مشترکہ آپریشن کیا گیا۔ جس میں لکی پولیس، سی ٹی ڈی اور امن کمیٹی نے حصہ لیا اور ایک مطلوب دہشتگرد کو ہلاک کر دیا۔

ہوید کے علاقے میں بھی پولیس اور امن کمیٹیوں نے دہشتگردوں کا مقابلہ کیا۔ جھڑپ کے دوران دہشتگرد اپنی پوزیشن چھوڑ کر بھاگ گئے جبکہ پولیس نے علاقے کو مکمل طور پر کلیئر کر دیا، جسے عوام اور فورسز کی بڑی مشترکہ کامیابی سمجھا جا رہا ہے۔

ایک اور بڑا معرکہ ڈومیل میں دیکھنے میں آیا۔ جہاں دہشتگردوں نے پولیس کی اے پی سی پر فائرنگ کی۔ پولیس جوان مقابلے پر ڈٹ گئے۔ اطلاع ملنے پر بنوں پولیس، سی ٹی ڈی اور سیکیورٹی فورسز کی مزید نفری بھی پہنچ گئی۔

آٹھ گھنٹے طویل آپریشن کے بعد 6 خطرناک دہشتگرد ہلاک اور کئی زخمی ہو گئے۔ اس کارروائی میں بدنام زمانہ کمانڈر رسول عرف کمانڈر اَریانہ اور اس کے ساتھی بھی مارے گئے جبکہ بڑے پیمانے پر اسلحہ اور ایمونیشن برآمد ہوا۔

آئی جی خیبرپختونخوا ذوالفقار حمید نے بنوں ریجن کی پولیس، سی ٹی ڈی اور سیکیورٹی فورسز کی کارکردگی کو سراہا۔

انہوں نے کہا کہ ہم خیبرپختونخوا کی سرزمین کو فتنے سے پاک کر کے دم لیں گے جبکہ دہشتگردوں کا ان کی آخری پناہ گاہ تک پیچھا کیا جائے گا۔

Catch all the پاکستان News, Breaking News Event and Trending News Updates on GTV News


Join Our Whatsapp Channel GTV Whatsapp Official Channel to get the Daily News Update & Follow us on Google News.

اوپر تک سکرول کریں۔