پاکستان میں بے روزگاری میں نمایاں اضافہ، شرح 7 فیصد کے قریب پہنچ گئی

اسلام آباد: تازہ لیبر فورس سروے (LFS) 2024-25 کے ابتدائی اعداد و شمار میں انکشاف کیا گیا ہے کہ ملک میں بے روزگاری کی شرح بڑھ کر 7 فیصد کے قریب پہنچ گئی ہے۔

یہ اضافہ اس وقت سامنے آیا ہے جب 2021-22 کے سروے میں بیروزگاری 6.3 فیصد تک کم ہو گئی تھی۔ حکومت آئندہ ہفتے یہ رپورٹ باضابطہ طور پر شائع کرے گی۔

باخبر سرکاری ذرائع کے مطابق پاکستان بیورو آف اسٹیٹکس نے حال ہی میں منعقد ہونے والی “ڈیٹا فیسٹ” کانفرنس میں نئے سروے کے نتائج کی جھلک پیش کی، تاہم ماہرین نے وفاقی دارالحکومت اور بعض دیگر سیکٹرز کے ڈیٹا پر اعتراضات اٹھائے ہیں۔ چیف اسٹیٹسٹیشین PBS سے وضاحت طلب کی گئی، مگر خبر شائع ہونے تک کوئی جواب موصول نہیں ہوا۔

پچھلے سروے 2021-22 میں لیبر فورس کا حجم 71.76 ملین بتایا گیا تھا جبکہ مجموعی روزگار–برائے–آبادی تناسب 42.1 فیصد تھا۔

مرد و خواتین کے درمیان نمایاں فرق برقرار رہا، مردوں کا روزگار تناسب 64.1 فیصد جبکہ خواتین کا صرف 19.4 فیصد تھا۔ نوجوانوں میں بیروزگاری سب سے زیادہ 11.1 فیصد ریکارڈ ہوئی تھی۔

ذرائع کے مطابق تازہ ترین LFS پہلی مرتبہ انٹرنیشنل لیبر آرگنائزیشن (ILO) کے 19ویں ICLS معیار کے تحت تیار کیا گیا ہے، جو 1982 سے استعمال ہونے والے پرانے نظام کی جگہ لے رہا ہے۔ نیا فریم ورک مارکیٹ میں کیے جانے والے کام اور گھریلو استعمال کے لیے کی جانے والی پیداوار کو علیحدہ شمار کرتا ہے۔ اس کے نتیجے میں وہ لوگ جو اپنے کھیتوں کی پیداوار صرف گھریلو ضرورت کے لیے استعمال کرتے ہیں، یا بغیر معاوضہ خاندانی کام کرتے ہیں، اب “برسرِ روزگار” نہیں سمجھے جائیں گے جب تک وہ باضابطہ طور پر ملازمت کی تلاش میں نہ ہوں۔

ماہرین کا کہنا ہے کہ اس تبدیلی کے باعث لیبر فورس میں شامل افراد کی تعداد کم دکھائی دے گی، روزگار کی شرح نیچے آئے گی جبکہ بیروزگاری کی شرح بڑھ کر ظاہر ہو گی۔ دیہی خواتین اور غیر معاوضہ خاندانی کارکن سب سے زیادہ متاثر ہونے والے طبقات ہوں گے۔ ان میں سے کئی افراد اب لیبر فورس سے باہر تصور کیے جائیں گے اگر وہ مارکیٹ ورک کے لیے دستیاب یا اس کے متلاشی نہیں۔

نئے معیارات کے تحت مرتب کیے گئے اعداد و شمار سے ملک کے لیبر مارکیٹ ڈھانچے کی حقیقی تصویر سامنے آنے کی توقع کی جارہی ہے، تاہم تجزیہ کاروں کے مطابق اس کے ساتھ بے روزگاری کا بڑھتا ہوا رجحان پالیسی سازوں کے لیے بڑا چیلنج بن کر اُبھرے گا۔