سرکاری ملازمین کے لئے بڑی خوشخبری آ گئی

سرکاری ملازمین کے لئے بڑی خوشخبری آ گئی ہے۔

تفصیلات کے مطابق ایف بی آر ہیڈکوارٹرز میں چیئرمین ایف بی آر کی زیر صدارت بورڈ آف کونسل کے اجلاس میں ان لینڈ ریونیو افسران کے لیے انعامی حدود میں اضافہ کرنے کی منظوری دی گئی ہے۔

فیصلے کے مطابق شاندار اور محنتی کارکردگی دکھانے والے افسران کے لیے انعام کی زیادہ سے زیادہ حد 18 تنخواہوں سے بڑھا کر 24 تنخواہیں سالانہ کر دی گئی ہیں۔ اس حوالے سے ان لینڈ ریونیو ریوارڈ رولز 2021 میں اہم ترامیم کی گئیں، جن کے تحت نان کیڈر افسران اور عملے کے لیے نیا جائزہ اور تشخیصی نظام بھی متعارف کرایا گیا ہے۔

اجلاس میں طے پایا کہ بی ایس 16 اور اس سے اوپر کے ایکس کیڈر افسران کے علاوہ بی ایس 1 سے 15 کے عملے کو کارکردگی کی بنیاد پر مختلف زمروں میں تقسیم کیا جائے گا، اور سہ ماہی انعامات کے لیے سینئر اراکین کی مشترکہ رپورٹنگ کے ذریعے جدید جائزہ نظام نافذ کیا جائے گا۔

کچھ اراکین نے اسیسمنٹ کمیٹی کی تشکیل پر نظرثانی کی تجویز دی، تاہم اکثریت نے موجودہ نظام کی حمایت کی۔ بورڈ نے فیصلہ کیا کہ پورا جائزہ عمل آئی ٹی بیسڈ ہوگا اور پی آر اے ایل کو ہدایت دی گئی ہے کہ 7 دن کے اندر ڈیجیٹل فریم ورک کو فعال کیا جائے۔

اجلاس میں مزید بتایا گیا کہ کسٹمز ریوارڈ رولز 2012 میں پہلے ہی افسران کو 36 ماہ کی بنیادی تنخواہ تک انعام دینے کی اجازت ہے، اس لیے اس میں ترمیم کی ضرورت نہیں۔ بورڈ نے کیڈر افسران کو موجودہ انعامی ڈھانچے سے خارج کرنے کی تجویز کو مسترد کیا، تاہم ان کی غیر معمولی کارکردگی کے لیے خصوصی انعامی نظام پر آئندہ اجلاس میں غور کیا جائے گا۔