سیاستدانوں کے ایک ٹیبل پر بیٹھ کر مسائل حل کرنے کے حق میں ہیں، رانا ثنا اللہ

فیصل آباد: سینیٹر رانا ثنااللہ نے کہا ہے کہ سیاستدانوں کے ایک ٹیبل پر بیٹھ کر مسائل حل کرنے کے حق میں ہیں۔

تفصیلات کے مطابق فیصل آباد کے پانچ حلقوں میں ضمنی انتخابات کے دوران پولنگ پُرامن طریقے سے جاری ہے، جس کی تصدیق سینیٹر رانا ثنااللہ نے میڈیا سے گفتگو میں کی۔

اُن کا کہنا تھا کہ اب تک کسی حلقے سے ناخوشگوار واقعے یا شکایت کی اطلاع موصول نہیں ہوئی، انتخابی عمل مکمل طور پر شفاف اور پرسکون ماحول میں جاری ہے۔

سینیٹر رانا ثنااللہ نے کہا کہ عوام کارکردگی، خدمت اور ترقی کی بنیاد پر اپنا فیصلہ دیں گے۔

اُنہوں نے کہا کہ پاکستان نے ہمیشہ مسلم لیگ (ن) کے دور میں ترقی کی ہے اور آج ملک دوبارہ ترقی کی راہ پر گامزن ہے۔

قومی سلامتی سے متعلق بات کرتے ہوئے رانا ثنااللہ کا کہنا تھا کہ پاکستان نے معرکۂ حق میں پانچ گنا بڑے دشمن کو شکست دی، دنیا نے تسلیم کیا کہ جنگ پاکستان نے جیتی ہے، بھارت جنگ ہارنے کے بعد شرمندہ ہے۔

چیئرمین پی ٹی آئی کے حوالے سے گفتگو کرتے ہوئے اُنہوں نے کہا کہ بانی پی ٹی آئی نے ہمیشہ ڈیڈ لاک پیدا کیا اور اُن کی سیاست نے ملک کو نقصان کے سوا کچھ نہیں دیا۔ انہیں سیاست میں لانا بدقسمتی تھی۔

انتخابات کے حوالے سے ایک سوال پر انہوں نے کہا کہ اگر کوئی جعلی ووٹ کی بات کرے تو اُس کا کوئی ثبوت موجود نہیں، اس لیے ایسے الزامات بے بنیاد ہیں۔

سینیٹر رانا ثنااللہ کے مطابق فیصل آباد کے تمام حلقوں میں پولنگ کا عمل پُرامن اور بغیر کسی رکاوٹ کے جاری ہے۔