وزارت اطلاعات کے سینئر افسر اشفاق احمد خلیل وفاقی سیکریٹری اطلاعات و نشریات کے عہدے پر تعینات

اسلام آباد: وزیراعظم  شہباز شریف کی منظوری کے بعد وزارت اطلاعات کے سینئر افسراشفاق احمد خلیل کو وفاقی سیکریٹری اطلاعات و نشریات کے عہدے پر تعینات کر دیا گیا ہے۔ باقاعدہ نوٹیفیکیشن بھی جاری کر دیا گیا ہے۔

ذرائع کے مطابق وزیراعظم شہباز شریف نے وزارت اطلاعات کے سینئر افسران طارق خان، ارشد منیر، اشفاق احمد خلیل، محترمہ عمرانہ وزیر اور سعید احمد شیخ کے انٹرویوز کیے جن میں اشفاق احمد خلیل کو شارٹ لسٹ کر کے وفاقی سیکریٹری کے عہدے کے لیے منتخب کیا گیا۔

نئی تعیناتی کے بعد وزارت میں انتظامی اور پالیسی سطح پر تسلسل برقرار رہے گا اور حکومتی رابطہ کاری مزید مؤثر ہونے کی توقع ہے۔ وزارت اطلاعات کے مطابق اشفاق احمد خلیل کی قیادت میں وزارت عوام اور حکومت کے درمیان معلومات کے مؤثر تبادلے کو مزید مستحکم کرے گی۔

اشفاق احمد خلیل اس سے قبل وزارت اطلاعات و نشریات میں ایڈیشنل سیکریٹری کے طور پر خدمات سرانجام دے رہے تھے اور مختلف اہم ذمہ داریوں پر فائز رہ چکے ہیں۔ ان کی خدمات میں پریس انفارمیشن ڈیپارٹمنٹ پشاور میں ڈائریکٹر جنرل اور پاکستان ایمبیسی ٹوکیو، جاپان میں پریس قونصلر کے طور پر فرائض انجام دینا شامل ہیں۔

مزید برآں، اشفاق احمد ڈائریکٹوریٹ آف الیکٹرانک میڈیا اینڈ پبلی کیشنز، پیمرا، انفارمیشن سروس اکیڈمی اور پی آئی ڈی میں بھی مختلف اہم عہدوں پر تعینات رہے۔ ان کی متنوع تجربہ کاری وزارت کے انتظامی اور پالیسی معاملات میں مؤثر کردار ادا کرنے میں مددگار ثابت ہوگی۔