گرج چمک کے ساتھ شدید بارشوں کی پیشگوئی

محکمہ موسمیات نے پیشگوئی کی ہے کہ بلوچستان میں جاری خشک سالی کے خاتمے کے واضح امکانات پیدا ہو گئے ہیں۔

محکمہ موسمیات کے مطابق دسمبر میں ایک مضبوط مغربی سسٹم صوبے کے بڑے حصے کو متاثر کرے گا، جس سے گرج چمک کے ساتھ موسلادھار بارشیں ہونے کا امکان ہے۔

ترجمان محکمہ موسمیات نے بتایا کہ مغربی ہواؤں کا یہ طاقتور سلسلہ 6 دسمبر سے 10 دسمبر کے درمیان بلوچستان میں داخل ہوگا۔ یہ سلسلہ وقفے وقفے سے پورے مہینے کے دوران فعال رہنے کی توقع ہے۔ بارشیں ایسے علاقوں میں بھی ہوں گی جہاں کئی ماہ سے بارش نہیں ہوئی۔

محکمہ کے مطابق ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ سمیت کئی اضلاع میں نمایاں بارشیں متوقع ہیں۔ ان بارشوں سے خشک سالی میں نمایاں کمی آئے گی اور زیرِ زمین پانی کو بھی فائدہ پہنچے گا۔

کئی مقامات پر گرج چمک کے ساتھ موسلا دھار بارش جبکہ شمالی اور بلند علاقوں میں برف باری کی پیشگوئی بھی کی گئی ہے۔ ماہرین نے بتایا کہ اس سال شمال مغربی ہوائیں معمول سے زیادہ فعال ہیں جبکہ عرب سمندر سے آنے والی نمی بھی بلوچستان کی طرف بڑھ رہی ہے، جس کے باعث بارشوں کا یہ سلسلہ طویل ہوگا۔

آج کے موسم کے حوالے سے محکمہ موسمیات نے بتایا کہ ملک کے زیادہ تر علاقوں میں موسم سرد اور خشک رہے گا۔ پہاڑی علاقوں میں رات اور صبح کے اوقات میں شدید سردی ہوگی۔ پنجاب اور خیبر پختونخوا کے میدانی حصوں میں ہلکی سے درمیانی دھند پڑنے کا امکان ظاہر کیا گیا ہے۔

گزشتہ 24 گھنٹوں کے دوران ملک کے اکثر علاقوں میں موسم خشک رہا جبکہ پنجاب کے چند اضلاع میں معمولی دھند چھائی رہی۔