جب توہین عدالت کا نوٹس کروں گا تو اسی وقت ہتھکڑی لگا کر جیل بھیج دوں گا، جسٹس محسن

اسلام آباد ہائیکورٹ کے جج جسٹس محسن اختر کیانی نے کیس کی سماعت کے دوران ضلعی انتظامیہ پر سخت ناراضی کا اظہار کیا۔

انہوں نے کہا کہ عدالت نے جس ڈپٹی کمشنر کو سزا دی تھی، اسی افسر کو بعد میں صدرِ پاکستان کی طرف سے میڈل بھی دیا گیا۔ جج کے یہ ریمارکس عدالت میں موجود تمام افسران کیلئے واضح پیغام تھے۔

کیس اسلام آباد کے مختلف پٹوار سرکلز میں پرائیویٹ افراد کے ذریعے سرکاری کام کروانے سے متعلق تھا۔

عدالت نے یہ بات بھی پوچھی کہ اسلام آباد کی لوکل پوسٹوں کیلئے پورے پاکستان سے بھرتیاں کیوں کی جا رہی ہیں؟ جج نے کہا کہ لوکل پوسٹوں کا مقصد یہی ہوتا ہے کہ بھرتیاں مقامی علاقوں سے ہوں۔

عدالت نے ضلعی انتظامیہ کو حکم دیا کہ پٹواریوں کی بھرتی کیلئے نیا اور درست اشتہار جاری کیا جائے۔

جسٹس کیانی نے ریمارکس دیے کہ ہر کام عدالت کی توہین کے بعد کیوں کیا جاتا ہے؟

انہوں نے کہا کہ اگر دوبارہ توہین عدالت ہوئی تو وہ فوری کارروائی کریں گے اور کسی کو بھی موقع نہیں دیں گے۔

جج نے مزید کہا کہ ملک میں بے ایمانی بڑھنے سے نظام نہیں چل رہا۔

انہوں نے مثال دیتے ہوئے کہا کہ راولپنڈی میں چکوال کا پٹواری نہیں لگایا جاتا، نہ ہی پنجاب اور سندھ میں اسلام آباد کے لوگوں کو تعینات کیا جاتا ہے، تو پھر اسلام آباد کیلئے یہ اصول کیوں نہیں اپنایا جاتا؟

جسٹس کیانی نے ہدایت کی کہ آئندہ سماعت سے پہلے نیا اشتہار شائع کر کے رپورٹ پیش کی جائے۔ عدالت نے کیس کی مزید سماعت آئندہ ماہ تک ملتوی کر دی۔