عالمی یومِ یکجہتیِ فلسطین: وزیراعظم اور صدر مملکت کا یکجہتی پر مبنی خصوصی پیغام

اسلام آباد: عالمی یومِ یکجہتیِ فلسطین کے موقع پر وزیراعظم شہباز شریف اور صدرِ مملکت آصف علی زرداری نے پیغامات میں فلسطینی عوام سے مکمل یکجہتی کا اظہار کرتے ہوئے عالمی برادری پر زور دیا ہے کہ غزہ اور مقبوضہ فلسطینی علاقوں میں جاری انسانی المیے کے فوری خاتمے کے لیے عملی اقدامات کیے جائیں۔

وزیراعظم شہباز شریف کا پیغام

وزیراعظم نے اپنے بیان میں کہا کہ غزہ میں 70 ہزار سے زائد شہادتیں انسانیت کے لیے ایک بدترین سانحہ ہیں۔

انہوں نے بتایا کہ غزہ کے گھر، اسپتال، اسکول اور بنیادی ڈھانچے تباہ ہو چکے ہیں، جبکہ فلسطینی عوام نے ظلم و ستم کے باوجود غیر معمولی ہمت اور استقامت کا مظاہرہ کیا ہے۔

وزیراعظم نے کہا کہ فلسطینی عوام کے خلاف اسرائیلی جنگی جرائم کا عالمی احتساب ضروری ہے۔

انہوں نے دو ریاستی حل اور غزہ امن منصوبے کو مسئلے کے دیرپا حل کی اہم راہ قرار دیا۔

ان کا کہنا تھا کہ مستقل جنگ بندی قائم رہنی چاہیے اور اسرائیلی جارحیت کا فوری خاتمہ ناگزیر ہے۔

انہوں نے زور دیا کہ غزہ میں انسانی امداد کی بلا تعطل فراہمی یقینی بنائی جائے اور یو این آر ڈبلیو اے کو سیاسی مداخلت کے بغیر مکمل طور پر فعال ہونا چاہیے۔

وزیراعظم نے مزید کہا کہ اسرائیل کا فلسطینی سرزمین، بشمول غزہ، سے مکمل انخلا ضروری ہے، دنیا کو مغربی کنارے کی گھمبیر صورتحال پر بھی توجہ دینی چاہیے کیونکہ غیر قانونی بستیاں عالمی قوانین کی خلاف ورزی اور امن میں بڑی رکاوٹ ہیں۔

وزیراعظم شہباز شریف نے دوٹوک مؤقف اختیار کرتے ہوئے کہا کہ پاکستان فلسطین کے منصفانہ، جامع اور دیرپا حل اور فلسطینی عوام کے حقِ خودارادیت کی مکمل حمایت کرتا ہے۔

انہوں نے مزید کہا کہ پاکستان فلسطینی عوام کی جائز مزاحمت اور جدوجہدِ آزادی کی حمایت کرتا رہے گا۔

صدر آصف علی زرداری کا پیغام

صدرِ مملکت نے اپنے بیان میں کہا کہ پاکستان کے فلسطین کے ساتھ دیرینہ اور برادرانہ تعلقات ہیں جنہیں انتہائی اہمیت حاصل ہے۔

انہوں نے دوٹوک انداز میں کہا کہ پاکستان 1967 سے پہلے کی سرحدوں کے مطابق آزاد فلسطینی ریاست اور القدس کو اس کا دارالحکومت مانتا ہے اور اس مؤقف پر سفارتی حمایت جاری رکھے گا۔

صدر آصف زرداری نے بہادر فلسطینی عوام کی ثابت قدمی کو سلام پیش کیا اور کہا کہ ان کی ہمت اور جدوجہد نے تاریخ میں نیا باب رقم کیا ہے۔

انہوں نے کہا کہ پاکستان نے ہر بین الاقوامی فورم پر اسرائیلی مظالم کی مذمت کی ہے، جبکہ جنگ بندی، امداد کی فراہمی اور جنگی جرائم پر اسرائیل کے احتساب کا مطالبہ ہمیشہ سے کرتا آیا ہے۔