بیرون ملک جانے والے پاکستانیوں کو آف لوڈ کیوں کیا گیا؟ اصل وجہ سامنے آگئی

پاکستان کے بڑے شہروں کے ایئر پورٹس پر گزشتہ دنوں یہ خبریں سامنے آئیں کہ ایف آئی اے بعض پاکستانی شہریوں کو بغیر وجہ بتائے بیرونِ ملک جانے والی پروازوں سے روک دیتی تھی۔

 ذرائع کے مطابق یہ افواہیں اس وقت زور پکڑیں جب کچھ ایسے مسافروں کو بھی سوار ہونے سے روکا گیا جن کے پاس ورک ویزا موجود تھا۔ مختلف حلقوں نے اس اقدام کی شدید الفاظ میں مذمت کی تھی۔

اس معاملے پر نجی ٹی وی چینل کے پروگرام میں ایف آئی اے گجرانوالہ زون کے ڈائریکٹر محمد بن اشرف نے وضاحت پیش کی۔ انہوں نے بتایا کہ گزشتہ سال پاکستان سے جانے اور آنے والے مسافروں کی تعداد تقریباً 90 لاکھ تھی۔ حالیہ کشتی حادثات کے بعد رسک اینالسز یونٹ بنایا گیا جس نے جائزہ لیا تو پتا چلا کہ صرف ایک فیصد مسافروں کو مختلف وجوہات کی بنا پر آف لوڈ کیا گیا۔

محمد بن اشرف نے کہا کہ اگر ایک ماہ میں بیرونِ ملک جانے والے مسافروں کی تعداد ایک لاکھ ہو تو اس میں سے تقریباً 200 سے 300 مسافر آف لوڈ کیے جاتے ہیں۔ انہوں نے شہریوں کو یقین دلایا کہ یہ اقدامات محض حفاظتی اور قانونی بنیادوں پر کیے جاتے ہیں۔

ڈائریکٹر ایف آئی اے نے بتایا کہ اگر کسی مسافر کو عملے کی جانب سے ناانصافی یا کرپشن کا سامنا ہو تو وہ ایف آئی اے کی ویب سائٹ، ڈی جی کو ای میل یا پی ایم پورٹل پر شکایت درج کروا سکتے ہیں۔ مزید برآں اسلام آباد ایئر پورٹ سے جلد نئی امیگریشن ایپ متعارف کرائی جائے گی۔ اس ایپ کے ذریعے مسافر گھر بیٹھے اپنی تمام دستاویزات کی تفصیلات فراہم کرکے آف لوڈنگ سے متعلق معلومات حاصل کر سکیں گے۔