پیپلز پارٹی نے جمہوریت کے فروغ کیلئے ڈٹ کر مقابلہ کیا، صدر آصف علی زرداری

اسلام آباد: صدر مملکت آصف علی زرداری نے کہا ہے کہ پیپلز پارٹی نے جمہوریت کے فروغ کیلئے ڈٹ کر مقابلہ کیا۔

تفصیلات کے مطابق پاکستان پیپلز پارٹی کے 58 ویں یومِ تاسیس کے موقع پر صدرِ مملکت آصف علی زرداری نے اپنے خصوصی پیغام میں پارٹی کی طویل جدوجہد، جمہوری کردار اور عوامی حقوق کے تحفظ کے لیے جاری کوششوں کو خراجِ تحسین پیش کیا ہے۔

انہوں نے کہا کہ پاکستان پیپلزپارٹی نے ہمیشہ چیلنجز کا مقابلہ ہمت اور ثابت قدمی کے ساتھ کیا ہے۔

ان کا کہنا تھا کہ پیپلز پارٹی نے ہر دور میں جمہوریت کے فروغ کے لیے ڈٹ کر جدوجہد کی اور سیاسی عمل کو درست سمت دینے کے لیے اہم کردار ادا کیا۔

آصف علی زرداری نے شہید ذوالفقار علی بھٹو اور شہید محترمہ بینظیر بھٹو کو بھرپور خراجِ عقیدت پیش کرتے ہوئے کہا کہ دونوں رہنماؤں کی قربانیاں آج بھی پارٹی کا مشن اور عوامی جدوجہد کی بنیاد ہیں۔

صدر نے یاد دلایا کہ شہید ذوالفقار علی بھٹو کی قیادت میں پاکستان نے 1973 میں ایک متفقہ آئین حاصل کیا، جو آج بھی ملکی جمہوریت کی رہنمائی کر رہا ہے۔

اپنے پیغام میں انہوں نے کہا کہ پیپلزپارٹی کو وفاق کے استحکام کے لیے کی گئی کوششوں سمیت گلگت بلتستان اور آزاد کشمیر میں متعارف کرائی گئی اصلاحات پر فخر ہے۔

ان کا کہنا تھا کہ پیپلز پارٹی آغاز سے ہی مزدوروں، کسانوں، خواتین، اقلیتوں اور پسے ہوئے طبقات کی آواز رہی ہے اور یہی جدوجہد آج بھی پارٹی کے مشن کا مرکز ہے۔

صدر آصف علی زرداری نے تمام شہریوں، خصوصاً خواتین اور اقلیتوں کو بااختیار بنانے کے عزم کا اعادہ کرتے ہوئے کہا کہ پارٹی ورکرز اور سپورٹرز کو چاہیے کہ جمہوری اتحاد برقرار رکھیں، وفاق کی حفاظت کریں اور ایک روادار، ترقی پسند پاکستان کی تعمیر کے لیے اپنا بھرپور کردار ادا کریں۔