بحریہ ٹاؤن کے رہائشیوں کیلئے خطرے کی گھنٹی؛ ایک اور بُری خبر آگئی

لاہور میں بحریہ ٹاؤن کے رہائشی ایک بار پھر بڑی مشکل میں پڑ گئے، کیونکہ لیسکو نے واجبات کی عدم ادائیگی پر ان کے اہم پروجیکٹس کی بجلی منقطع کر دی۔

 کمپنی کے مطابق بحریہ ٹاؤن انتظامیہ 682 ملین روپے سے زائد رقم ادا کرنے میں ناکام رہی جس کے بعد سخت قدم اٹھانا پڑا۔ لیسکو کے سی ای او محمد رمضان بٹ نے بتایا کہ بحریہ ٹاؤن، بحریہ آرچرڈ، بحریہ ایجوکیشن سٹی اور کنگ ریٹ ایسوسی ایٹس کا ایک بڑا پروجیکٹ بار بار نوٹس ملنے کے باوجود بل جمع نہیں کرا سکا۔ ان کا کہنا تھا کہ جب تک پوری رقم ادا نہیں ہوتی، بجلی بحال نہیں کی جائے گی۔

لیسکو کی تفصیلات کے مطابق بحریہ ٹاؤن پر 530 ملین روپے، بحریہ آرچرڈ پر 137 ملین روپے، بحریہ ایجوکیشن سٹی پر 5.465 ملین روپے جبکہ کنگ ریٹ پروجیکٹ پر 2.7 ملین روپے واجب الادا ہیں۔ ادائیگی کی آخری تاریخ 27 نومبر رکھی گئی تھی، لیکن اس کے بجائے ڈیولپر نے معاملہ عدالت لے جانے کا فیصلہ کیا۔

بجلی کٹنے کے بعد بحریہ ٹاؤن کے رہائشیوں میں شدید غصہ دیکھنے میں آیا۔ لوگوں کا کہنا ہے کہ گھروں میں کھانا خراب ہو گیا، پانی اور دیگر ضروری امور بری طرح متاثر ہوئے۔ متعدد رہائشیوں نے دفاتر کے باہر احتجاج کی تیاری بھی شروع کر دی ہے۔

یہ پہلا موقع نہیں ہے کہ بحریہ ٹاؤن میں بجلی کا بحران پیدا ہوا ہو۔ اس سے پہلے 2024 میں بھی لیسکو نے 762 ملین روپے کے نادہندہ واجبات پر بجلی کاٹ دی تھی۔ اس کے علاوہ اسلام آباد میں بحریہ ٹاؤن کے کچھ پروجیکٹس میں اوور بلنگ اور سولر سسٹم کی کٹوتیوں کی شکایات بھی سامنے آچکی ہیں۔ لیسکو کا کہنا ہے کہ جیسے ہی بقایاجات ادا کیے جائیں گے، بجلی فوری بحال کر دی جائے گی۔