بینظیر انکم سپورٹ پروگرام سے رقم وصول کرنیوالوں کیلئے بڑی خوشخبری؛ اہم فیصلہ ہوگیا

پاکستان میں ایک کروڑ سے زائد غریب خواتین پہلی بار باقاعدہ بینک اکاؤنٹس کی حامل بن گئی ہیں۔

اب یہ خواتین بینظیر انکم سپورٹ پروگرام (بی آئی ایس پی) کے تحت ماہانہ وظائف ڈیجیٹل طور پر وصول کر سکیں گی۔ اس سے قبل مستحق خواتین کے پاس بینک اکاؤنٹس موجود نہیں تھے اور وہ محدود سہولت والے "لیمٹڈ لائبلیٹی” اکاؤنٹس کے ذریعے رقوم حاصل کرتی تھیں۔

بی آئی ایس پی کے سیکریٹری عامر علی احمد کے مطابق 10 ملین موبائل والٹ اکاؤنٹس کھولنے کا عمل حکومت کے اجلاسوں کے بعد ممکن ہوا۔ اعداد و شمار کے مطابق 31 لاکھ اکاؤنٹس ایچ بی ایل نے، 30 لاکھ بینک الفلاح نے، 20 لاکھ بینک آف پنجاب نے، 12 لاکھ جازکیش نے اور تقریباً 7 لاکھ ایزی پیسہ نے کھولے ہیں۔ یہ اکاؤنٹس خواتین کے شناختی کارڈز سے منسلک ہوں گے اور موبائل فون کے ذریعے استعمال کیے جائیں گے۔ حکومت ٹیلی کام کمپنیوں کے تعاون سے مفت سم کارڈز بھی فراہم کر رہی ہے۔

تمام رقوم صرف بائیومیٹرک تصدیق کے بعد نکل سکیں گی اور کسی قسم کے ڈیبٹ کارڈ جاری نہیں کیے جائیں گے، تاکہ کسی ایجنٹ یا گھر کے مردوں کے ذریعے استحصال کا خاتمہ کیا جا سکے۔ اب تک 17 لاکھ سم کارڈز تقسیم کیے جا چکے ہیں اور حکومت کا ہدف ہے کہ آئندہ ماہ کے آخر تک 30 فیصد اور مارچ تک 80 فیصد سم کارڈز فراہم کر دیے جائیں۔

وزیر مملکت برائے خزانہ بلال اظہر کیانی کے مطابق وزیر اعظم شہباز شریف کا ہدف ہے کہ اگلے سال جون تک بی آئی ایس پی کی تمام ادائیگیاں 100 فیصد ڈیجیٹل کر دی جائیں۔ صوبوں کے لیے سم کارڈز کی تقسیم کے اہداف بھی مقرر کیے گئے ہیں: پنجاب کو 51 لاکھ، سندھ کو 26 لاکھ، خیبر پختونخوا کو 22 لاکھ، بلوچستان کو 4.85 لاکھ، آزادکشمیر کو 1.67 لاکھ، گلگت بلتستان کو 1.15 لاکھ اور اسلام آباد کو 21 ہزار سمز فراہم کی جائیں گی۔

بی آئی ایس پی کا آغاز 2008 میں غریب ترین خاندانوں کی مالی معاونت کے لیے کیا گیا تھا۔ موجودہ سہ ماہی وظیفہ 13,500 روپے ہے جو آئی ایم ایف کی شرط کے تحت جنوری سے 14,500 روپے ہونے کا امکان ہے۔ حکومت نے پروگرام کے لیے بجٹ میں 716 ارب روپے مختص کیے ہیں۔

اہم چیلنج ان خواتین تک رسائی ہے، جن کے پاس موبائل فون موجود نہیں۔ ملک میں موجود 16 ہزار اے ٹی ایمز میں سے صرف 6 ہزار ہی بائیومیٹرک تصدیق کی سہولت رکھتے ہیں، تاہم صارفین قریبی دکانوں پر موجود بائیومیٹرک ڈیوائسز سے بھی تصدیق کر سکیں گے۔