سرکاری نوکری کی خواہشمند خواتین کو حکومت نے بڑی خوشخبری سُنادی

اسلام آباد: وفاقی ملازمتوں میں خواتین کے لیے مختص کوٹہ پر عملدرآمد کی تازہ ترین صورتحال جاننے کے لیے اسٹیبلشمنٹ ڈویژن نے تمام وزارتوں اور ڈویژنوں سے رپورٹ طلب کر لی ہے۔

ذرائع کے مطابق وزارتوں، ڈویژنوں، منسلک محکموں، ذیلی دفاتر اور آئینی اداروں میں ملازمت کرنے والی خواتین کی تعداد مجموعی طور پر 31 ہزار سے زائد ہے، جو وفاقی ملازمتوں میں 5.83 فیصد کے تناسب کے برابر ہے۔

دستاویز کے مطابق ملک کی 38 وفاقی وزارتوں اور ڈویژنوں میں کل ملازمین کی تعداد 5 لاکھ 81 ہزار 158 ہے، جن میں مرد ملازمین 5 لاکھ 50 ہزار 126 اور خواتین ملازمین 31 ہزار 455 ہیں۔

اسٹیبلشمنٹ ڈویژن نے واضح کیا ہے کہ تمام ادارے خواتین کے لیے مختص 10 فیصد کوٹہ کی موجودہ صورتحال اور اس پر عملدرآمد کی تفصیلی رپورٹ فراہم کریں تاکہ حکومت خواتین کی ملازمتوں میں شمولیت بڑھانے کے اقدامات کا جائزہ لے سکے۔

ذرائع کے مطابق یہ اقدام وفاقی ملازمتوں میں صنفی توازن اور خواتین کی نمائندگی کو بہتر بنانے کے لیے اٹھایا گیا ہے، اور اس کے بعد حکومتی سطح پر مستقبل کے اقدامات کا تعین کیا جائے گا۔