پاک سرزمین کے بہادر سپوت، لانس نائیک محمد محفوظ شہید (نشان حیدر) کا 54 واں یوم شہادت

پاک فوج کے بہادر سپوت، لانس نائیک محمد محفوظ شہید (نشانِ حیدر) کا 54 واں یومِ شہادت ملک بھر میں عقیدت و احترام کے ساتھ منایا جا رہا ہے۔

لانس نائیک محمد محفوظ شہید 25 اکتوبر 1944 کو ضلع راولپنڈی کے گاؤں پنڈ ملکاں میں پیدا ہوئے۔ پاک فوج میں شمولیت ان کا دیرینہ خواب اور زندگی کا مقصد تھا، جس جذبے کے تحت انہوں نے 8 مئی 1963 کو پنجاب رجمنٹ میں باقاعدہ شمولیت اختیار کی۔

1971 کی جنگ میں، لانس نائیک محمد محفوظ واہگہ اٹاری سیکٹر میں دشمن کے خلاف صفِ اوّل میں موجود تھے۔ 17 دسمبر کی شب ہدف کی جانب پیش قدمی کے دوران انہیں دشمن کی شدید مزاحمت کا سامنا کرنا پڑا۔ دشمن کی پوزیشن تقریباَ 70 میٹر کے فاصلے پر تھی، جس کے باعث پیش قدمی رک گئی۔

شدید مزاحمت کے دوران، لانس نائیک محمد محفوظ کی لائیٹ مشین گن تباہ ہو گئی۔ تاہم، انہوں نے ایک شہید ساتھی کی مشین گن سنبھال کر بھرپور انداز سے دشمن کے ہدف کو نشانہ بنایا۔ شدید زخموں کے باوجود وہ دشمن کے مورچے تک پہنچے اور بھارتی فوج کے مشین گنر کی گردن دبوچ کر اسے ہلاک کر دیا۔ اسی مورچے میں موجود درندہ صفت دشمن نے سنگین وار کر کے لانس نائیک محمد محفوظ کو شہید کر دیا۔

محمد محفوظ شہید کی بے مثال جرات و شجاعت کا اعتراف بھارتی کمانڈر لیفٹیننٹ کرنل پوری نے بھی کیا۔ انہوں نے کہا کہ اپنی پوری پیشہ ورانہ زندگی میں انہوں نے اتنے دلیر سپاہی نہیں دیکھے، اور اگر محمد محفوظ ان کی فوج میں ہوتے تو انہیں بہادری کے اعلیٰ ترین اعزاز کے لیے نامزد کرتے۔

لانس نائیک محمد محفوظ شہید کی قربانی کو پاکستان کے سب سے بڑے عسکری اعزاز "نشانِ حیدر” سے نوازا گیا۔ ان کا یوم شہادت مادر وطن کے لیے افواجِ پاکستان کی لازوال قربانیوں کی روشن مثال کے طور پر یاد رکھا جاتا ہے۔