طالبان کا افغان سرزمین دہشتگردوں کے لیے استعمال نہ کرنے کا دعویٰ جھوٹا ثابت

اقوامِ متحدہ کی سلامتی کونسل نے افغان طالبان کے اس دعوے کو مسترد کر دیا ہے کہ وہ افغان سرزمین کو سرحد پار حملوں یا دہشتگرد سرگرمیوں کے لیے استعمال نہیں ہونے دے رہے۔

سلامتی کونسل کی تجزیاتی معاونت اور پابندیاں مانیٹرنگ ٹیم کی 16 ویں رپورٹ میں طالبان کے اس دعوے کو "غیر معتبر” قرار دیا گیا۔

رپورٹ میں خبردار کیا گیا کہ خطے کے ممالک افغانستان کو بڑھتی ہوئی علاقائی عدم استحکام کا ممکنہ مرکز سمجھنے لگے ہیں۔

رپورٹ کے مطابق داعش خراسان، تحریک طالبان پاکستان (TTP)، القاعدہ، ترکستان اسلامی پارٹی، جماعت انصاراللہ اور دیگر دہشتگرد گروہ افغانستان میں سرگرم ہیں اور بعض بیرونی حملوں کی منصوبہ بندی بھی کر رہے ہیں۔

اقوامِ متحدہ کے مطابق القاعدہ طالبان کے ساتھ قریبی روابط رکھتی ہے، جبکہ داعش خراسان طالبان کا اہم مخالف ہے۔

رپورٹ میں ٹی ٹی پی کو سب سے بڑا علاقائی خطرہ قرار دیا گیا، جو افغان پناہ گاہوں سے کارروائیاں کر رہی ہے۔

اس سلسلے میں طالبان قیادت میں اختلاف پایا جاتا ہے، کچھ سینئر ارکان ٹی ٹی پی کو پاکستان کے ساتھ تعلقات کے لیے نقصان دہ سمجھتے ہیں، جبکہ دیگر اب بھی اس کی حمایت کرتے ہیں۔

رپورٹ میں بتایا گیا ہے کہ ٹی ٹی پی نے 2025 میں پاکستان میں 600 سے زائد حملے کیے، جن میں سے کئی پیچیدہ نوعیت کے تھے اور زیادہ تر خودکش حملہ آور افغان شہری تھے۔

اقوامِ متحدہ کی رپورٹ میں یہ بھی ذکر ہے کہ پاکستان نے انسدادِ دہشتگردی میں اہم پیشرفت کی ہے، جس میں داعش خراسان کے ترجمان سلطان عزیز اعظم اور دیگر کلیدی شدت پسندوں کی گرفتاری شامل ہے۔