انٹرمیڈیٹ سطح پر انجینئرنگ، میڈیکل اور سائنس جنرل گروپس ختم کرنے کی تجویز

 اسلام آباد: انٹر بورڈز کوآرڈینیشن کمیشن (IBCC) نے انٹرمیڈیٹ (HSSC) کی سطح پر انجینئرنگ، میڈیکل اور سائنس جنرل جیسے روایتی سبجیکٹ گروپس کے خاتمے کی تجویز دے دی ہے، جس کا مقصد طلبہ کو تعلیمی میدان میں زیادہ لچک اور بہتر مواقع فراہم کرنا ہے۔

اس حوالے سے منگل کو آئی بی سی سی سیکریٹریٹ میں تعلیم سے وابستہ تمام اہم اسٹیک ہولڈرز کی شمولیت سے ایک اعلیٰ سطحی مشاورتی اجلاس منعقد ہوا، جس میں سیکنڈری اسکول سرٹیفکیٹ (SSC) اور ہائر سیکنڈری اسکول سرٹیفکیٹ (HSSC) کی سطح پر سبجیکٹ گروپس سے متعلق درپیش مسائل کا تفصیلی جائزہ لیا گیا۔

اجلاس کی صدارت ایگزیکٹو ڈائریکٹر IBCC ڈاکٹر غلام علی ملاح نے کی۔ انہوں نے شرکاء کو ان مشکلات سے آگاہ کیا جن کا سامنا طلبہ کو کرنا پڑتا ہے، خاص طور پر ایسے طلبہ جنہوں نے سائنس کے بیشتر مضامین پاس کیے ہوتے ہیں مگر انہیں ہیومینٹیز گروپ کے تحت ایکویلنس جاری کی جاتی ہے، جو ان کے لیے اعلیٰ تعلیم کے راستے محدود کر دیتی ہے۔

مشاورتی اجلاس میں موجودہ سبجیکٹ گروپ سسٹم کے مثبت اور منفی پہلوؤں کا تفصیل سے جائزہ لیا گیا اور اس بات پر غور کیا گیا کہ یہ نظام طلبہ کی تعلیمی نقل و حرکت اور اعلیٰ تعلیم تک رسائی میں کس حد تک رکاوٹ بن رہا ہے۔

شرکاء نے انجینئرنگ اور میڈیکل جیسے سبجیکٹ گروپس کے خاتمے کی سفارش کرتے ہوئے سبجیکٹ بیسڈ نظام اپنانے کی تجویز دی، جس کے تحت جامعات میں داخلے طلبہ کے پاس کردہ مخصوص مضامین کی بنیاد پر ہوں گے، نہ کہ پہلے سے مقررہ گروپس کی بنیاد پر۔

اجلاس میں ہائر ایجوکیشن کمیشن (HEC)، پاکستان میڈیکل اینڈ ڈینٹل کونسل (PM&DC)، نیشنل کریکولم کونسل، صوبائی نصابی اداروں، امتحانی بورڈز اور دیگر متعلقہ اداروں کے نمائندگان نے SSC سطح پر بھی سبجیکٹ گروپس کے خاتمے اور مضامین کو الگ الگ رکھنے کی حمایت کی، تاکہ طلبہ کو زیادہ تعلیمی لچک فراہم کی جا سکے۔

اسی مقصد کے تحت متعلقہ اداروں کے نمائندگان پر مشتمل ایک قومی مشترکہ ورکنگ گروپ تشکیل دیا گیا ہے، جو آئندہ اجلاس میں تفصیلی سفارشات پیش کرے گا۔

اجلاس میں چیئرمین سندھ بی سی سی فقیر محمد لاکھو، چیئرمین کے پی بی سی سی پروفیسر تسبیح اللہ، چیئرمین فیڈرل بورڈ ڈاکٹر اکرام علی ملک، چیئرمین ایس بی ٹی ای کراچی پروفیسر مشرف علی راجپوت، چیئرمین بی آئی ایس ای مردان پروفیسر جہانزیب، کنٹرولر امتحانات پی ایم ڈی سی ڈاکٹر امداد خشک، ڈائریکٹر این سی سی ڈاکٹر تبسم ناز، ڈائریکٹر ایچ ای سی قاضی عابد، کنسلٹنٹ شفیق اعوان اور آئی بی سی سی کے افسران نے شرکت کی، جبکہ بی آئی ایس ای کوئٹہ اور سندھ، پنجاب و بلوچستان کے نصابی اداروں کے نمائندگان نے آن لائن شرکت کی۔

مشاورتی فورم کی سفارشات میں کہا گیا کہ HSSC سطح پر سبجیکٹ گروپس کی ضرورت نہیں، کیونکہ جامعات اور ریگولیٹری ادارے داخلوں کے لیے گروپ بندی کے بجائے مضامین کی بنیاد پر فیصلے کرتے ہیں۔ مزید یہ کہ SSC کی اہلیتی گروپس کا ازسرنو جائزہ لے کر انہیں کالج داخلوں کے لیے آسان اور زیادہ لچکدار بنایا جائے، جبکہ SSC سطح پر تعلیمی اور پیشہ ورانہ (ہنر مند) تعلیم کو فروغ دینے یا مہارت پر مبنی مضامین کو نصاب میں شامل کرنے پر بھی غور کیا جائے۔

شرکاء نے تعلیمی مسائل کے حل کے لیے تمام متعلقہ فریقین کو ایک پلیٹ فارم پر جمع کرنے میں IBCC کے فعال کردار کو سراہا اور ان اصلاحات کو بین الاقوامی بہترین تعلیمی طریقۂ کار سے ہم آہنگ قرار دیا، تاکہ طلبہ کے لیے تعلیم کے زیادہ جامع اور ہموار راستے فراہم کیے جا سکیں۔