"متحدہ عرب امارات کے صدر شیخ محمد بن زاید النہیان کا پاکستان دورہ: اقتصادی اور اسٹریٹجک تعلقات کو فروغ دینے کی تیاریاں”

اسلام آباد:متحدہ عرب امارات کے صدر شیخ محمد بن زاید النہیان جمعہ کے روز پاکستان کا دورہ کریں گے۔ سرکاری ذرائع کے مطابق معزز مہمان کو پاکستان آمد پر شاندار استقبال دیا جائے گا۔
ذرائع کا کہنا ہے کہ اس دورے کے دوران پاکستان اور یو اے ای کے درمیان دوطرفہ تعلقات، علاقائی سلامتی اور باہمی دلچسپی کے امور پر تفصیلی مشاورت کی جائے گی۔ ملاقاتوں میں تجارت، اقتصادی تعاون اور مجموعی علاقائی صورتحال بھی زیر بحث آئے گی۔
وزیراعظم شہباز شریف نے متحدہ عرب امارات کے ساتھ اقتصادی روابط کو مزید فروغ دینے پر زور دیا ہے، خصوصاً توانائی، معدنیات، آئی ٹی، ریلوے اور ہوا بازی کے شعبوں میں تعاون کو وسعت دینے کی ضرورت پر روشنی ڈالی ہے۔ وزیراعظم نے یہ بات پاکستان میں یو اے ای کے سفیر سالم محمد سالم البواب الزابی سے اسلام آباد میں ملاقات کے دوران کہی، جنہوں نے ان سے خیرسگالی ملاقات کی۔
وزیراعظم نے یو اے ای کو پاکستان میں اہم شعبہ جات میں مزید سرمایہ کاری کی دعوت دیتے ہوئے کہا کہ اس سے پاکستان کی اقتصادی ترقی اور استحکام کو تقویت ملے گی۔ انہوں نے دونوں ممالک کے درمیان تجارتی حجم پر اطمینان کا اظہار کرتے ہوئے مشکل اوقات میں یو اے ای کی جانب سے پاکستان کی مسلسل حمایت، بشمول انسانی ہمدردی کی امداد اور ترقیاتی منصوبوں، کو سراہا۔
اس موقع پر یو اے ای کے سفیر سالم محمد سالم البواب الزابی نے پاکستان کے ساتھ تمام شعبوں میں شراکت داری کو مزید گہرا کرنے کے لیے متحدہ عرب امارات کے پختہ عزم اور گہری دلچسپی کا اظہار کیا۔
سیاسی و سفارتی حلقوں کے مطابق یو اے ای کے صدر کا یہ دورہ پاکستان اور متحدہ عرب امارات کے درمیان اسٹریٹجک شراکت داری کو نئی جہت دینے میں اہم کردار ادا کرے گا۔