پی آئی اے نے برطانیہ کیلئے فلائٹ آپریشن بڑھانے کا اعلان کردیا

قومی ایئر لائن پی آئی اے نے برطانیہ کے لیے اپنی پروازوں کے دائرہ کار میں اضافے کا اہم فیصلہ کر لیا ہے۔

 ایئر لائن ذرائع کے مطابق لندن کے لیے باقاعدہ فلائٹ آپریشن آئندہ سال مارچ 2026 سے شروع کیا جائے گا۔ اس فیصلے کو پاکستان اور برطانیہ کے درمیان فضائی روابط کے لیے ایک مثبت پیش رفت قرار دیا جا رہا ہے۔

ذرائع کا کہنا ہے کہ پی آئی اے کو لندن کے ہیتھرو ایئرپورٹ پر ہفتہ وار چار پروازوں کے سلاٹس مل چکے ہیں۔ یہ سلاٹس اس سے قبل پابندی کے دور میں ضائع ہونے سے بچانے کے لیے عارضی طور پر ترکش ایئرلائن کے حوالے کیے گئے تھے۔ اب یہ سلاٹس دوبارہ قومی ایئر لائن کو واپس مل گئے ہیں۔

ایئر لائن حکام کے مطابق اس انتظام کا مقصد قیمتی سلاٹس کو محفوظ رکھنا تھا تاکہ مستقبل میں برطانیہ کے لیے پروازوں کی بحالی میں مشکلات پیش نہ آئیں۔ پابندی کے خاتمے کے بعد پی آئی اے نے ہیتھرو ایئرپورٹ انتظامیہ کو تحریری طور پر آگاہ کر دیا ہے کہ مارچ 2026 سے لندن کے لیے اپنی پروازیں دوبارہ شروع کی جائیں گی۔

ذرائع کے مطابق لندن روٹ کی بحالی سے مسافروں کو بہتر سفری سہولیات ملیں گی۔ برطانیہ میں مقیم پاکستانیوں کے لیے براہِ راست سفر آسان ہو جائے گا۔ اس کے ساتھ ساتھ پی آئی اے کی آمدن میں اضافے کی بھی توقع ہے۔

حکام کا کہنا ہے کہ اس پیش رفت سے قومی ایئر لائن کی مالی حالت میں بہتری آئے گی۔ فضائی شعبے میں اعتماد بحال ہوگا۔ مجموعی طور پر اس اقدام کے ملکی معیشت پر بھی مثبت اثرات مرتب ہونے کی امید ظاہر کی جا رہی ہے۔