فیلڈ مارشل نے اقلیتوں کے حقوق کے تحفظ کو نظریہ پاکستان کا اہم ستون قرار دیدیا

آئی ایس پی آر کا کہنا ہے کہ فیلڈ مارشل عاصم منیر نے کرسمس کے  موقع پر راولپنڈی چرچ کا دورہ کیا۔

پاک فوج کے شعبہ تعلقات عامہ ( آئی ایس پی آر ) کے مطابق فیلڈ مارشل عاصم منیر نے راولپنڈی میں کرسمس کی تقریبات میں شرکت کی۔

آئی ایس پی آر کے مطابق مسیحی برادری کے مذہبی تہوار کی تقریب کرائسٹ چرچ میں منعقد ہوئی، فیلڈ مارشل نے مسیحی برادری کو کرسمس کی مبارکباد دی اور تقریب میں شریک افراد سے گفتگو کی۔

  آئی ایس پی آر کا کہنا ہے کہ فیلڈ مارشل نے قائد اعظم محمد علی جناحؒ کے وژن کو خراج تحسین پیش کیا، اقلیتوں کے حقوق کے تحفظ کو نظریہ پاکستان کا اہم ستون قرار دیا۔

آئی ایس پی آر کے مطابق مسیحی برادری نے فیلڈ مارشل عاصم منیر کے دورے پر شکریہ ادا کیا۔ فیلڈ مارشل عاصم منیر نے امن و خوشحالی کیلئے نیک خواہشات کا اظہار کیا۔

 فیلڈ مارشل عاصم منیر نے کہا کہ اقلیتوں کے حقوق کا تحفظ پاکستان کے نظریے کی بنیاد ہے، پاکستانی مسیحیوں کی قومی ترقی، دفاع میں خدمات قابل فخر ہیں، بین المذاہب ہم آہنگی اور اتحاد پاکستان کی اصل طاقت ہے، پاک فوج تمام شہروں کے وقار، سلامتی، مساوی حقوق کے تحفظ کیلئے پرعزم ہے۔

آئی ایس پی آر کے مطابق مسیحی برادری کے رہنماؤں نے فیلڈ مارشل عاصم منیر کے دورے پر اظہار تشکر کیا۔