کراچی پورٹ پر اینٹی نارکوٹکس فورس کی تاریخی کارروائی، 47 کلو کوکین برآمد

کراچی: اینٹی نارکوٹکس فورس (اے این ایف) نے کراچی بندرگاہ پر بڑی اور کامیاب کارروائی کرتے ہوئے منشیات اسمگلنگ کی ایک بڑی کوشش ناکام بنا دی ہے۔

اے این ایف کے مطابق درآمد شدہ ایک کنٹینر سے 47 کلوگرام کوکین برآمد کی گئی ہے، جو انسدادِ منشیات کے حوالے سے ادارے کی تاریخ کی سب سے بڑی کوکین برآمدگی قرار دی جا رہی ہے۔

ترجمان اے این ایف کا کہنا ہے کہ ضبط کی گئی منشیات کی عالمی مارکیٹ میں مالیت لاکھوں ڈالر بنتی ہے۔

یہ کارروائی انٹیلی جنس پروفائلنگ اور رسک اسیسمنٹ کی بنیاد پر کی گئی۔ اے این ایف نے اسکریپ سے بھرے سات درآمدی کنٹینرز کو مشکوک قرار دیا تھا۔

یہ کنٹینرز گوجرانوالہ روانہ کیے جانے تھے، تاہم روانگی سے قبل ان کی انتہائی باریک بینی سے مکمل جانچ پڑتال کی گئی۔

جامع تلاشی کے دوران ایک کنٹینر کے اندر نہایت مہارت سے چھپائی گئی کوکین برآمد ہوئی۔ حکام کے مطابق منشیات اس انداز میں چھپائی گئی تھیں کہ عام جانچ میں ان کا سراغ لگانا مشکل تھا۔

اے این ایف حکام کا کہنا ہے کہ یہ کامیابی فورس کی پیشہ ورانہ صلاحیت، جدید انٹیلی جنس نظام اور مؤثر نگرانی کا واضح ثبوت ہے۔

اینٹی نارکوٹکس فورس ملک بھر میں سمندری بندرگاہوں، ڈرائی پورٹس، شاہراہوں، بین الصوبائی راستوں اور ہوائی اڈوں پر منشیات اسمگلنگ کے خلاف بھرپور کارروائیاں جاری رکھے ہوئے ہے۔

ترجمان نے واضح کیا کہ اے این ایف ملک سے منشیات کی لعنت کے مکمل خاتمے کے لیے پُرعزم ہے اور اسمگلنگ میں ملوث عناصر کے خلاف زیرو ٹالرنس پالیسی کے تحت کارروائیاں جاری رہیں گی۔