سرکاری ملازمین کیلئے بڑی خوشخبری آگئی؛ حکومت کا اہم فیصلہ

پنجاب حکومت نے سرکاری اسکولوں کے اساتذہ کے لیے ایک اہم اور حوصلہ افزا فیصلہ کر لیا ہے۔

صوبے بھر کے تعلیمی اداروں میں بہتر کارکردگی دکھانے والے اساتذہ کو ماہانہ کارکردگی الاؤنس دیا جائے گا۔ اس اقدام کا مقصد اساتذہ کی حوصلہ افزائی کرنا اور تعلیمی معیار کو مزید بہتر بنانا ہے۔

محکمہ تعلیم کے مطابق یہ الاؤنس پرائمری، ایلمینٹری، ہائی اور ہائیر سیکنڈری اسکولوں کے اساتذہ کے لیے مختص کیا گیا ہے۔ پرائمری اسکولوں میں خدمات انجام دینے والے اساتذہ کو اچھی کارکردگی پر 5 ہزار روپے دیے جائیں گے۔ ایلمینٹری اسکولوں کے اساتذہ کے لیے یہ رقم 7 ہزار 500 روپے مقرر کی گئی ہے۔

اسی طرح ہائی اسکولوں میں پڑھانے والے اساتذہ کو 10 ہزار روپے کارکردگی الاؤنس ملے گا۔ ہائیر سیکنڈری اسکولوں کے اساتذہ کے لیے سب سے زیادہ 12 ہزار 500 روپے الاؤنس دینے کا فیصلہ کیا گیا ہے۔ بعض کیٹیگریز میں یہ رقم 15 ہزار 500 روپے تک بھی جا سکتی ہے، جس کا انحصار کارکردگی کے معیار پر ہوگا۔

محکمہ تعلیم کے حکام کا کہنا ہے کہ اس فیصلے سے اساتذہ میں محنت اور لگن کا جذبہ بڑھے گا۔ اس کے ساتھ ساتھ طلبہ کے نتائج اور مجموعی تعلیمی ماحول میں بھی بہتری آئے گی۔ حکام کے مطابق کارکردگی جانچنے کے لیے واضح معیار مقرر کیے جائیں گے تاکہ شفاف انداز میں الاؤنس دیا جا سکے۔