کراچی والے تیاری کرلیں!!! طوفانی بارشوں کے نئے سلسلے کی پیشگوئی؛ کس تاریخ کو بارش ہوگی؟

محکمہ موسمیات نے ملک کے مختلف علاقوں میں بارش اور سرد موسم سے متعلق پیشگوئی جاری کر دی ہے۔

 محکمہ موسمیات کے مطابق 28 دسمبر کو مغربی ہواؤں کا سلسلہ ملک میں داخل ہونے کا امکان ہے، جو بالائی علاقوں میں اثر ڈالے گا۔ 29 دسمبر کو بلوچستان اور اس کے ملحقہ علاقوں میں بارش متوقع ہے۔

 کراچی میں سردیوں کی پہلی بارش 30 دسمبر کو ہونے کا امکان ہے، جہاں مغربی ہواؤں کا نظام منگل سے بدھ کے دوران اثر انداز ہو سکتا ہے۔ اس کے بعد شہر میں سردی میں اضافہ متوقع ہے۔

بلوچستان، خیبر پختونخوا، کشمیر اور گلگت بلتستان میں 29 دسمبر سے 2 سے 3 جنوری 2026 تک بارش کا سلسلہ جاری رہ سکتا ہے۔ شمالی بلوچستان اور دیگر شمالی علاقوں میں برفباری کا امکان بھی ظاہر کیا گیا ہے۔

اس دوران جنوبی پنجاب اور سندھ میں ہلکی بارش کی توقع ہے۔ لاہور میں آج موسم جزوی ابر آلود رہنے کا امکان ہے جبکہ سردی میں شدت بڑھ گئی ہے۔ شہر میں ہواؤں کی رفتار تقریباً دو کلومیٹر فی گھنٹہ ریکارڈ کی گئی ہے۔

محکمہ موسمیات نے شہریوں کو ہدایت کی ہے کہ وہ موسمی حالات کے پیش نظر احتیاطی تدابیر اپنائیں اور غیر ضروری سفر سے گریز کریں۔