انجینئر علی مرزا کا جیل میں عمران خان کے حوالے سے اہم انکشاف

اسلام آباد: مذہبی اسکالر انجینئر محمد علی مرزا نے اڈیالہ جیل میں سابق وزیرِاعظم عمران خان کے ساتھ اپنے تجربات کے حوالے سے اہم انکشاف کیا ہے۔

صحافی ارشاد بھٹی کے ساتھ ایک پوڈکاسٹ میں گفتگو کرتے ہوئے انجینئر مرزا نے بتایا کہ جیل میں ان کی چکی اور عمران خان کی چکی کے درمیان صرف ایک دیوار کا فاصلہ تھا۔ جیل کے اس حصے میں تین افراد کے لیے تین چکیاں موجود تھیں، جبکہ عمران خان کے لیے الگ چھ چکیاں اور ایک مشقتی مختص کیا گیا تھا۔

انجینئر مرزا نے کہا کہ کبھی کبھار وہ عمران خان کی آواز سن سکتے تھے، جو مشقتی کے ساتھ کرکٹ کے موضوع پر بات کرتے تھے، لیکن سیاست پر گفتگو نہیں کرتے تھے۔

انہوں نے یہ بھی بتایا کہ عمران خان کو جیل میں ٹی وی اور دو روزنامے فراہم کیے گئے تھے۔ کھانے کے حوالے سے مرزا نے کہا کہ انہیں کچا گوشت دیا جاتا تھا جسے مشقتی پکاتا تھا اور اکثر دیسی گھی کی خوشبو محسوس ہوتی تھی۔ عمران خان دن میں دو مرتبہ کھانا کھاتے تھے: ناشتہ صبح نو بجے اور دوپہر کا کھانا تین بجے۔

انجینئر مرزا کے مطابق چار نومبر کے بعد وہ عمران خان کی آواز سننا بند ہو گئی۔ بعد ازاں معلوم ہوا کہ عمران خان کو جیل کے دوسرے حصے میں منتقل کر دیا گیا تھا، جہاں انہیں دھوپ حاصل ہو سکتی تھی۔