اپنا گھر بنانے کا خواب!!! کم آمدنی والے افراد کیلئے بڑی خوشخبری آگئی

پنجاب حکومت نے کم آمدن طبقے کے لیے ایک نیا اور بڑا ہاؤسنگ منصوبہ متعارف کروا دیا ہے۔ اس منصوبے کا مقصد ایسے افراد کو سستی اور باعزت رہائش فراہم کرنا ہے جو برسوں سے اپنے گھر کے خواب کی تکمیل کے منتظر ہیں۔

 حکومت کے مطابق یہ گھر کم لاگت، آسان اقساط اور جدید بنیادی سہولیات سے آراستہ ہوں گے۔ حکام نے بتایا ہے کہ اس منصوبے کے تحت اڑھائی سے تین مرلہ سرکاری زمین پر 37 ہزار سے زائد مکانات تعمیر کیے جائیں گے۔

 ان گھروں کی تعمیر پنجاب کے مختلف اضلاع میں کی جائے گی، تاکہ زیادہ سے زیادہ خاندان اس سہولت سے فائدہ اٹھا سکیں۔ اس منصوبے سے لاہور، گوجرانوالہ، فیصل آباد، ملتان، سیالکوٹ، لیہ، خانیوال سمیت پنجاب کے 25 اضلاع کے شہری مستفید ہوں گے۔

پنجاب افورڈیبل ہاؤسنگ پراجیکٹ کے ڈائریکٹر عمران علی سلطان نے وزیرِ ہاؤسنگ بلال یاسین کو منصوبے پر تفصیلی بریفنگ دی۔ بریفنگ میں بتایا گیا کہ ورلڈ بینک کے تعاون سے 25 اضلاع کے 35 مختلف مقامات پر گھروں کی تعمیر کا آغاز کیا جائے گا۔ حکام کے مطابق سرکاری زمین پر آئندہ تین ماہ کے دوران پرائیویٹ سیکٹر کی شراکت سے تعمیراتی کام باقاعدہ طور پر شروع کر دیا جائے گا۔

وزیرِ ہاؤسنگ بلال یاسین نے کہا کہ حکومت کی اولین ترجیح کم آمدن افراد کو معیاری اور محفوظ رہائش فراہم کرنا ہے۔ ان کا کہنا تھا کہ یہ منصوبہ نہ صرف رہائشی مسائل میں کمی لائے گا بلکہ لوگوں کے معیارِ زندگی کو بہتر بنانے میں بھی مددگار ثابت ہوگا۔