سیکیورٹی فورسز کی خیبرپختونخوا میں دو کارروائیاں، بھارتی پراکسی فتنہ الخوارج کے 11 خوارج جہنم واصل

8 جنوری 2026 کو صوبہ خیبرپختونخوا میں دو علیحدہ جھڑپوں کے دوران بھارتی پراکسی فتنہ الخوارج سے تعلق رکھنے والے 11 خوارج ہلاک کر دیے گئے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق خوارج کی موجودگی کی اطلاع پر شمالی وزیرستان ضلع میں سیکیورٹی فورسز کی جانب سے انٹیلی جنس بیسڈ آپریشن کیا گیا۔ آپریشن کے دوران خوارج کے ٹھکانے کو مؤثر انداز میں نشانہ بنایا گیااور شدید فائرنگ کے تبادلے کے بعد 6 خوارج کو جہنم واصل کر دیا گیا۔

اسی طرح ضلع کرم میں پولیس اور سیکیورٹی فورسز نے مشترکہ انٹیلی جنس بیسڈ آپریشن کیا جس میں میں 5 خوارج کو ہلاک ہوئے۔

آئی ایس پی آر نے بتایا کہ ہلاک ہونے والے بھارتی سرپرستی میں سرگرم خوارج سے اسلحہ اور گولہ بارود بھی برآمد کیا گیا، جو سیکیورٹی فورسز، قانون نافذ کرنے والے اداروں کے خلاف متعدد دہشت گرد کارروائیوں اور بے گناہ شہریوں کی ٹارگٹ کلنگ میں ملوث رہے۔

آئی ایس پی آر کا کہنا ہے کہ علاقے میں کسی بھی دیگر بھارتی سرپرستی یافتہ خارجی کے خاتمے کے لیے کلیئرنس آپریشن جاری ہے، جبکہ قومی ایکشن پلان کے تحت وفاقی ایپکس کمیٹی کی منظور کردہ وژن “عزمِ استحکام” کے مطابق سیکیورٹی فورسز اور قانون نافذ کرنے والے اداروں کی جانب سے دہشت گردی کے خلاف بے مثال مہم پوری رفتار سے جاری رہے گی تاکہ ملک سے غیر ملکی سرپرستی اور حمایت یافتہ دہشت گردی کے ناسور کا مکمل خاتمہ کیا جا سکے۔