بارشیں ہی بارشیں اور برفباری؛ محکمہ موسمیات نے خطرناک پیشگوئی کردی

محکمہ موسمیات نے ملک کے مختلف حصوں میں بارش اور برفباری سے متعلق نئی پیشگوئی جاری کر دی ہے۔ رپورٹ کے مطابق آئندہ چند دنوں میں موسم مزید سرد ہو سکتا ہے اور کئی علاقوں میں بارش اور برفباری کا امکان ہے۔

محکمہ موسمیات کا کہنا ہے کہ اسلام آباد میں موسم سرد رہے گا جبکہ مطلع جزوی طور پر ابرآلود رہنے کی توقع ہے۔ آزاد کشمیر اور گلگت بلتستان کے مختلف علاقوں میں چند مقامات پر بارش اور پہاڑی علاقوں میں برفباری ہو سکتی ہے۔ ان علاقوں میں سردی کی شدت میں بھی اضافہ متوقع ہے۔

دوسری جانب جیوانی، پسنی، اورماڑہ، کیچ اور تربت میں بھی چند مقامات پر بارش کی پیشگوئی کی گئی ہے۔ پی ڈی ایم اے نے صورتحال کے پیش نظر الرٹ جاری کر دیا ہے۔ الرٹ کے مطابق راولپنڈی، مری، گلیات اور پوٹھوہار ریجن میں شدید سردی کے ساتھ برفباری کے امکانات موجود ہیں۔ شہریوں کو غیر ضروری سفر سے گریز کی ہدایت کی گئی ہے۔

محکمہ موسمیات کے مطابق 16 سے 18 جنوری کے دوران ملک بھر میں مغربی ہواؤں کا ایک مضبوط سلسلہ داخل ہونے کا امکان ہے۔ اس دوران راولپنڈی اور اسلام آباد کے شہری علاقوں میں کم سے کم درجہ حرارت غیر معمولی حد تک گر سکتا ہے۔ رات کے اوقات میں سردی زیادہ محسوس ہونے کا امکان ہے۔

پشاور میں 15 سے 25 ملی میٹر تک بارش متوقع ہے۔ اس کے علاوہ 23 سے 25 جنوری کے درمیان شہر اور گردونواح میں باقاعدہ برفباری بھی ہو سکتی ہے۔ کم سے کم درجہ حرارت منفی 5 ڈگری سینٹی گریڈ تک گرنے کا خدشہ ظاہر کیا گیا ہے۔

بلوچستان کے بیشتر علاقوں میں موسم انتہائی سرد رہنے کا امکان ہے۔ بعض مقامات پر بارش اور برفباری ہو سکتی ہے۔ محکمہ موسمیات کے مطابق 21 سے 23 جنوری کے دوران صوبے بھر میں 60 سے 100 کلومیٹر فی گھنٹہ کی رفتار سے ٹھنڈی اور برفیلی ہوائیں چلنے کی توقع ہے، جس سے سردی کی شدت مزید بڑھ سکتی ہے۔