یو اے ای جانے کے خواہشمند پاکستانیوں کیلئے خوشخبری؛ حکومت نے بڑی سہولت متعارف کروادی

یو اے ای جانے کے خواہشمند پاکستانیوں کیلئے خوشخبری آگئی ہے۔

اسلام آباد میں وفاقی وزیر داخلہ محسن نقوی سے متحدہ عرب امارات کے اعلیٰ سطحی وفد کی ملاقات ہوئی۔ اس وفد کی قیادت ڈائریکٹر جنرل کسٹمز و پورٹ سیکیورٹی احمد بن لاحج الفلاسی نےکی۔ ملاقات میں پاکستان اور یو اے ای کے تعلقات، باہمی تعاون اور مسافروں کے لیے امیگریشن کے عمل کو آسان بنانے پر تفصیلی تبادلہ خیال کیا گیا۔

اس دوران دونوں ممالک نے "پری امیگریشن کلیئرنس” کے حوالے سے باضابطہ معاہدہ کرنے پر اتفاق کیا۔ اس نظام کا آغاز ابتدائی طور پر پائلٹ بنیادوں پر کیا جائے گا اور پہلا مرحلہ کراچی سے شروع ہوگا۔ وفاقی وزیر داخلہ محسن نقوی نے بتایا کہ اس نئے نظام کے تحت مسافروں کی امیگریشن اور کلیئرنس پاکستان میں مکمل ہو گی، جس کے بعد وہ یو اے ای پہنچنے پر طویل امیگریشن عمل سے گزرے بغیر سیدھا ایئرپورٹ سے باہر نکل سکیں گے۔

محسن نقوی نے کہا کہ اس اقدام سے مسافروں کو سفر میں آسانی، وقت کی بچت اور بہتر تجربہ حاصل ہوگا۔ یو اے ای وفد نے بھی اس منصوبے کو دونوں ممالک کے عوام کے لیے فائدہ مند قرار دیتے ہوئے مکمل تعاون کی یقین دہانی کرائی۔

ملاقات میں یہ بھی طے پایا کہ پائلٹ منصوبے کے انتظامی اور تکنیکی معاملات کو حتمی شکل دینے کے لیے حکام رابطہ کاری جاری رکھیں گے، اور کامیاب پائلٹ کے بعد اس نظام کو دیگر مقامات تک مرحلہ وار توسیع دی جائے گی۔

یو اے ای وفد میں ایگزیکٹو ڈائریکٹر ڈیجیٹل ٹرانسفارمیشن جما عبداللہ القابی، ایگزیکٹو ڈائریکٹر ایئرپورٹس حماد سیف المشغونی اور دیگر اعلیٰ حکام شامل تھے۔ ملاقات میں وزیر مملکت برائے داخلہ طلال چوہدری اور وفاقی سیکرٹری داخلہ خرم آغا بھی موجود تھے۔