گل پلازہ سانحے پر ریسکیو آپریشن کی نگرانی کیلئے 6 ٹیمیں تشکیل

کراچی: گل پلازہ میں لگنے والی آگ کے بعد جاری ریسکیو اور امدادی کارروائیوں کی نگرانی کے لیے ڈپٹی کمشنر جنوبی کراچی نے 6 ٹیمیں تشکیل دے دی ہیں۔ ہر ٹیم میں ایک سربراہ، دو اسسٹنٹ کمشنرز اور دو مختیارکار شامل ہوں گے۔ تمام ٹیمیں تین شفٹوں میں کام کریں گی تاکہ ریسکیو آپریشن بلا تعطل جاری رہ سکے۔

پہلی ٹیم کی قیادت ڈائریکٹر اینٹی انکروچمنٹ امیر فضل اویس کریں گے، جو رات 10 بجے سے صبح 6 بجے تک کمانڈنگ افسر کے فرائض انجام دیں گے۔ ان کے ساتھ دو اسسٹنٹ کمشنرز اور دو مختیارکار شامل ہیں۔

دوسری ٹیم ڈپٹی کمشنر ساؤتھ جاوید نبی کھوسو کی قیادت میں صبح 6 بجے سے دوپہر 2 بجے تک کام کرے گی۔ تیسری ٹیم اے ڈی سی ون ساؤتھ اسمیٰ بتول کی سربراہی میں دوپہر 2 بجے سے رات 10 بجے تک ذمہ دار ہوگی۔

چوتھی ٹیم اے ڈی سی ون سینٹرل عاصم عباسی کی قیادت میں رات 10 بجے سے صبح 8 بجے تک کام کرے گی، جبکہ پانچویں ٹیم اے ڈی سی ون ایسٹ سمیع اللہ سنجرانی کی قیادت میں صبح 8 بجے سے شام 4 بجے تک اپنی خدمات انجام دے گی۔

چھٹی اور آخری ٹیم اے ڈی سی ون کیماڑی عبدالستارہ کڑو کی سربراہی میں شام 4 بجے سے رات 12 بجے تک کمانڈنگ افسر کے فرائض سرانجام دے گی۔

انتظامیہ کے مطابق تمام ٹیمیں گل پلازہ سانحے کے بعد جاری ریسکیو اور امدادی سرگرمیوں کی کڑی نگرانی کریں گی تاکہ متاثرین کو بروقت مدد فراہم کی جا سکے۔