عوام کی موجیں؛ فروری کے آغاز پر 4 تعطیلات ایک ساتھ

لاہور کے شہریوں کو فروری کے آغاز میں طویل تعطیلات ملنے کا امکان ہے۔ صوبائی دارالحکومت میں بسنت کی تقریبات کے باعث حکومت کی جانب سے چھٹیوں کے حوالے سے غور کیا جا رہا ہے۔

 ذرائع کے مطابق 5 فروری کو یومِ کشمیر کی سرکاری تعطیل پہلے سے موجود ہے۔ اس کے بعد ہفتہ اور اتوار کی ہفتہ وار چھٹیاں بھی آ رہی ہیں۔ اس کے علاوہ جمعہ کو بھی عام تعطیل دینے کی تجویز زیر غور ہے۔ اگر اس تجویز کی منظوری ہو جاتی ہے تو شہریوں کو مسلسل چار دن کی چھٹیاں مل جائیں گی۔

انتظامیہ کے مطابق لاہور میں بسنت کی تقریبات 6، 7 اور 8 فروری کو منعقد کی جائیں گی۔ ان تقریبات کے دوران شہر میں رش اور ٹریفک کے دباؤ میں اضافے کا خدشہ ہوتا ہے۔ اسی وجہ سے اضافی تعطیلات پر غور کیا جا رہا ہے تاکہ غیر ضروری آمد و رفت کو کم کیا جا سکے۔

انتظامیہ کا کہنا ہے کہ تعطیلات کی صورت میں موٹر سائیکل سواروں کی نقل و حرکت محدود ہوگی، جس سے سیکیورٹی انتظامات بہتر بنائے جا سکیں گے۔ اس کے ساتھ ساتھ قانون نافذ کرنے والے اداروں کو امن و امان برقرار رکھنے میں بھی آسانی ہوگی۔

حکام کے مطابق اس حوالے سے حتمی فیصلہ جلد کیا جائے گا۔ منظوری ملنے کے بعد باقاعدہ نوٹیفکیشن جاری کر دیا جائے گا۔