میرے پسندیدہ فیلڈ مارشل کیسے ہیں؟ امریکی صدر ٹرمپ کا شہباز شریف سے سوال

اسلام آباد: وزیراعظم شہباز شریف نے بتایا ہے کہ ڈیووس میں ورلڈ اکنامک فورم کے دوران امریکی صدر ڈونلڈ ٹرمپ نے ان سے سوال کیا، "میرے پسندیدہ فیلڈ مارشل کیسے ہیں؟”

وزیراعظم نے کہا کہ اس پر انہوں نے فیلڈ مارشل سید عاصم منیر کی طرف اشارہ کیا جو تقریب میں موجود تھے۔ یہ لمحہ عالمی ٹی وی چینلز نے بھی دکھایا۔

وزیراعظم نے مزید بتایا کہ اس ملاقات کے دوران انہوں نے صدر ٹرمپ کی غزہ بورڈ آف پیس کی کوششوں کی تعریف کی۔ انہوں نے کہا کہ یہ اقدام جنگ سے متاثرہ علاقے میں امن قائم کرنے کے لیے اہم قدم ہے۔

شہباز شریف نے کہا، "میں نے صدر ٹرمپ سے کہا کہ اگر وہ فلسطینی عوام کے لیے امن، وقار اور بنیادی حقوق یقینی بنانے میں کامیاب ہو جاتے ہیں اور غزہ کی تعمیر نو میں کامیابی حاصل ہوتی ہے تو تاریخ میں یہ ان کی عظیم وراثت کے طور پر یاد رکھی جائے گی۔”

انہوں نے پاکستان اور بھارت کے درمیان کشیدگی ختم کرنے میں صدر ٹرمپ کے مؤثر کردار کو بھی سراہا اور اظہار تشکر کیا۔ وزیراعظم کے مطابق صدر ٹرمپ نے خود پاکستانی آرمی چیف کے بارے میں بھی پوچھا، جسے انہوں نے خوشگوار اور تعمیری ملاقات قرار دیا۔

وزیراعظم نے کہا کہ یہ مختصر ملاقات نہایت مثبت اور دوستانہ ماحول میں ہوئی۔